කොළඹ මහ නගර සභාවේ නගරාධිපති නිල නිවසේ පවිත්‍රතා කටයුතුවලට ගත වූ වසර පහේදී රුපියල් කෝටි එකහමාරකට අධික මුදලක් වැය කර ඇතැයි තොරතුරු පනතින් කළ අයැදුමකට පිළිතුරු වශයෙන් නාගරික ලේකම් කාර්යාලය සඳහන් කර තිබෙනවා.
2018 වසරේදී රුපියල් 947,724ක් ද, 2019 වසරේදී රුපියල් 4,199,499ක් ද, 2020 වසරේදී රුපියල් 3,814,072ක් ද, 2021 වසරේදී රුපියල් රුපියල් 4,608,708ක් ද, 2022 වසරේදී රුපියල් 1,537,890ක් ද වශයෙන් මෙම බිල්පත් ගෙවා ඇතැයි නාගරික ලේකම් කාර්යාලය පවසනවා.
රෝසි සේනානායක මහත්මිය කොළඹ මහ නගරාධිපති ධූරයට පත්වීමෙන් පසුව එහි නිල නිවසේ පිරිවැය සම්බන්ධයෙන් කොළඹ මහ නගර සභාවේ එක්සත් ජාතික පක්ෂයේ ම හිටපු මන්ත්‍රීවරුන් සිවු දෙනෙකු විසින් තොරතුරු දැනගැනීමේ අයිතිය පනතෙන් කරනු ලැබූ අයැදුමකට පිළිතුරු වශයෙන් මෙම තොරතුරු ලබා දී තිබෙනවා.
එකී නිල නිවස පවිත්‍ර කිරීමට සේවකයන් සපයන පෞද්ගලික ආයතනයකින් මුල් අවස්ථාවේදී සේවකයන් 8 දෙනෙකු ද 2021 පෙබරවාරි 16 සිට සේවකයන් 9ක් ද වශයෙන් මෙම රුපියල් 15,107,894ක මුදල ගෙවා සේවකයන් යොදා ගෙන තිබෙන අතර ගෙමිදුල පමණක් පිරිසුදු කිරීමට සේවකයන් තිදෙනෙකු යොදා තිබෙන බව ද සඳහන් වෙනවා.
ඉඩම් කළමනාකරණ හා පරිසර සංවර්ධන ඒකකය මඟින් දැනුම් දී තිබෙන්නේ ඔවුන් පෙරවරු 8.00 සිට පස්වරු 1.00 දක්වා රාජකාරි සිදුකරන බවත් නිල නිවසේ ඉදිරිපිට ගෙමිදුල පිරිසුදු කිරීමේ කටයුතු සඳහා විහාරමහා දේවි උද්‍යානයේ සේවකයන් තිදෙනෙකු යොදාගෙන ඔවුන්ට රුපියල් 909,000ක් ගෙවා තිබෙන බව ද සඳහන්.
එසේ ම, රෝසි සේනානායක මහත්මිය කොළඹ මහ නගර සභාවේ නගරාධිපති නිල නිවෙස 2018 සිට 2023 දක්වා භාවිත කළ මුළු සේවා කාලපරිච්ඡේදය තුළ විදුලි බිල්පත් ගාස්තුවේ මුළු එකතුව රුපියල් මිලියන 9ක් වන බව මොවුන් පෙන්වා දෙනවා.
ඒ අනුව, නිල නිවසේ විදුලිය පරිභෝජනයේදී හා පවිත්‍රතාවලට සේවකයන් යෙදවීමේදී නගර සභාවේ ක්‍රියාපටිපාටීන්ට පටහැනිව කටයුතු කර ඇති බව සඳහන් කරමින් හිටපු නාගරික මන්ත්‍රීවරුන් පිරිස අල්ලස් හෝ දූෂණ චෝදනා විමර්ශන කොමිෂන් සභාවට ඊයේ (08)පැමිණිලි කර තිබෙනවා.
ඔවුහු සිය පැමිණිල්ලේ සඳහන් කර තිබෙන්නේ කොළඹ මහ නගර සභාවේ නිසි ක්‍රියාපටිපාටි හා එම පිළිවෙත් අනුව නගරාධිපති නිල නිවස සඳහා මුළු සේවකයන් 4ක් පමණ භාවිත කළ හැකි අවස්ථාවක නගර සභාවේ සේවකයන් 3ක් හා පෞද්ගලික ආයතනයකින් සේවකයන් 9 දෙනා බැගින් මුළු සේවකයන් 12 දෙනෙකු පවිත්‍රතා කටයුතු සඳහා යොදා මුදල් ගෙවා තිබීම ගැටලුවක් බවයි.
හිටපු නගරාධිපතිනිය රජයේ මුදල් අවභාවිත කරමින් හෝ වෙනත් පාර්ශ්වයක් වෙත වාසි ලැබෙන ආකාරයට කටයුතු කරමින් අල්ලස් කොමිෂන් සභාවේ පිහිටුවා ඇති 1994 අංක 19 දරන (සංශෝධිත) පනතේ 70 වගන්තිය සඳහන් දූෂණය නමැති වරද සිදුකර තිබේදැයි සොයාබැලීමට විමර්ශනයක් පවත්වන ලෙස එම එජාප මන්ත්‍රීවරුන් පැමිණිල්ල මගින් ඉල්ලා තිබෙනවා.
