නිරිතදිග පාකිස්තානයට ඇදහැලෙන අධික වර්ෂාපතනය සහ අකුණු අනතුරු මඟින් පුද්ගලයින් 39 දෙනෙකු මියගොස් ඇති බව විදෙස් මාධ්‍ය පවසනවා.
මියගිය පිරිස අතර වැඩි දෙනෙක් ගොවීන් වන අතර ඔවුන් තිරිඟු අස්වනු නෙළීමේ නිරතව සිටියදී අකුණු අනතුරුවලට ලක්වී ඇති බව සඳහන් වෙනවා.
ඇදහැලෙන අධික වර්ෂාපතනය හේතුවෙන් ගොවි බිම් රැසක් ද ජලයෙන් යටවී පවතින අතර ඒ හෙතුවෙන් විදුලිබල සැපයුම සහ ප්‍රවාහන සේවා ද අඩාල වී ඇති බව වාර්තා වෙනවා.
දේශගුණික විපර්යාසවල බලපෑම හේතුවෙන් පකිස්ථානය මේ දිනවල බරපතළ ලෙස ඉහළ ගොස් ඇති කාලගුණික අනතුරුවලට මුහුණ පා සිටිනවා.
2022 වසරේදී පාකිස්තානයට බලපෑ ගංවතුර තත්ත්වය හේතුවෙන් ඇති වු අනතුරු මඟින් පුද්ගලයින් 1700කට අධික පිරිසක් මියගොස් තවත් දහසකට අධික පිරිසක් තුවාල ලැබුවා.
එමෙන්ම 2022 වසරේදී ගංවතුරෙන් පීඩාවට පත් වූ කයිබර් පක්තුන්ක්වා සහ බලුකිස්තාන් ඇතුළු සමහර ප්‍රදේශවලට මෑත කාලයේදී හට ගත් කුණාටු හේතුවෙන් නැවතත් බලපෑම් එල්ල වෙමින් පවතින බවද වාර්තා වෙනවා.
පකිස්තානයේ ජාතික ආපදා කළමනාකරණ අධිකාරියට අනුව ඉදිරි දිනවලදී වර්ෂාපතනයේ තවදුරටත් වැඩි වීමක් අපේක්ෂා කරන අතර ඒ හේතුවෙන් නායයෑම් සහ හදිසි ගංවතුර පිළිබඳ අනතුරු ඇඟවීම්ද නිකුත් කර තිබෙනවා.
