ටියුනීසියාවට ඔබ්බෙන් වූ මුහුදේ බෝට්ටුව මුහුදුබත් වීමෙන් අවම වශයෙන් සංක්‍රමණිකයන් 43 දෙනෙකු දියේ ගිලී මිය ගොස් ඇති බව ටියුනීසියානු රතු ක්‍රෙසන්ට් සංවිධානය පවසයි.
ඊජිප්තුව, සුඩානය, එරිත්‍රියාව සහ බංග්ලාදේශය යන රටවලින් සංක්‍රමණිකයන් 120 දෙනෙකු රැගත් බෝට්ටුව ලිබියාවේ වයඹදිග වෙරළ තීරයේ සුවාරා සිට පිටත් වූ බව වාර්තා වේ.
මෑත මාසවලදී, ටියුනීසියානු වෙරළට ඔබ්බෙන් දියේ ගිලී යාමේ සිදුවීම් කිහිපයක්ම වාර්තා වී තිබිණි.
කාලගුණය යහපත් අතට හැරී ඇති හෙයින් ටියුනීසියාව සහ ලිබියාවේ සිට ඉතාලිය දක්වා යුරෝපයට යෑමට උත්සාහ කිරීමේ වාර ගණන වැඩි වී ඇතැයි පැවසේ.
ලක්ෂ සංඛ්‍යාත ජනතාවක් මෑත වසරවලදී අනතුරුදායක ලෙස මධ්‍යධරණි තරණය කර ඇති අතර, ඔවුන්ගෙන් බොහෝ දෙනෙක් අප්‍රිකාවේ සහ මැද පෙරදිග ගැටුම් හා දරිද්‍රතාවය හේතුවෙන් පලායන්නන් වේ.
