ශ්රී ලංකාවට චීස් ආනයනය කිරීම සඳහා 2018 සහ 2019 යන වසර දෙකේදී රුපියල් කෝටි හාරසිය අසූ තුනක් වැයකර ඇතැයි පශු සම්පත්, ගොවිපොළ ප්රවර්ධන හා කිරි හා බිත්තර ආශ්රිත කර්මාන්ත රාජ්ය ඇමැති ඩී.බී හේරත් මහතා ඊයේ (07දා) පාර්ලිමේන්තුවේදී ප්රකාශ කරන ලදි.
එහෙත් එම වසර දෙකේදී මෙරට නිෂ්පාදනය කළ චීස් අපනයනය කිරීමෙන් උපයා ඇත්තේ රුපියල් හාර කෝටි අනූ ලක්ෂයක් පමණක් බවයි රාජ්ය ඇමැතිවරයා සඳහන් කළේ.
2019 වසරේදී ශ්රී ලංකාව චීස් ලීටර් දහසය ලක්ෂ හත්දහස් හතළිස් එකක් නිෂ්පාදනය කර ඇතැයිද ,මෙරට කිරි ආශ්රිත නිෂ්පාදන අවශ්යතාවයෙන් සියයට හැටක් ආනයනය කිරීමට සිදුවීම ප්රබල ගැටලුවක් බවද කී ඇමැතිවරයා විදෙස් රටවලින් ආනයනය කරන කිරිපිටි වර්ග භාවිතය සම්බන්ධයෙන් ගැටලු පවතින බවද පවසන ලදි.
රාජ්ය ඇමැතිවරයා මේ බව ප්රකාශ කර සිටියේ මාතර දිස්ත්රික් මන්ත්රී බුද්ධික පතිරණ මහතා ඉදිරිපත් කළ ප්රශ්නයකට පිළිතුරු දෙමින්.
ආනයනය කරන කිරි හා කිරි ආශ්රිත නිෂ්පාදනවල ප්රමිතිය සම්බන්ධයෙන් ගැටලු රැසක් පවතින බවයි මන්ත්රී බුද්ධික පතිරණ මෙහිදී පෙන්වා දුන්නේ.