අනුමත රේගු බදු නොගෙවා වාහන අමතර කොටස් ආනයනය කර පසුව ඒවා එකලස් කර ඉතා වටිනා වාහන නිපදවා අලෙවි කිරීමේ ජාවාරමක් පිළිබඳ තොරතුරු අල්ලස් දූෂණ කොමිසම විසින් අනාවරණය කරගෙන තිබෙනවා.
මේ හේතුවෙන් රජයට අහිමි වී ඇති බදු ආදායම රුපියල් කෝටි සිය ගණනක්.
කොමිසමට ලැබුණු තොරතුරු අනුව මෙලෙස නීතිවිරෝධී ලෙස එකලස් කරන ලද වටිනා වර්ගවලට අයත් ජීප් හා කාර් රථ 500ක් පමණ දැනට විවිධ ඉහළ පෙළේ පුද්ගලයන් සතුව තිබෙන බව වාර්තා වන්නේ.
වාහන දෙකක් අත්අඩංගුවට ගෙන පරීක්ෂණ පැවැත්වීමේදී මහා පරිමාණ ජාවාරම ගැන තොරතුරු හෙළිවි තිබෙනවා.
වාර්තා වන ආකාරයට මෙම ජාවාරම සඳහා මෝටර් රථ ප්‍රවාහන දෙපාර්තමේන්තුවේ පරිගණක අංශයේ ඉහළ නිලධාරියකු හා සහකාර ප්‍රවාහන කොමසාරිස් මට්ටමේ නිලධාරියකු ද සම්බන්ධ බවද අල්ලස් දූෂණ කොමිසමේ ආරංචි මාර්ග පවසනවා.
මෙලෙස වංචාකාරී ලෙස ලියාපදිංචි කරන ලද අලුත් ජීප් හා කාර් රථ සඳහා ලබා දී ඇති ඇතැම් අංක ට්‍රක්ටර් මෝටර් සයිකල් හා ලොරි රථවලට කලින් ලබා දී ඇති වාහන අංක බව කරන ලද පරීක්ෂණවලදී වැඩිදුරටත් හෙළිදරව් වී තිබෙනවා.
