ප්‍රංශය ඇතුළු යුරෝපා සංගමයේ රටවල් චීනය ඉලක්ක කරගෙන ඉන්දු පැසිෆික් කලාපයේ සන්නද්ධ හමුදා හැසිරවීම සිදුකරන බවට චීනය චෝදනා නගා තිබේ.
ලා ඔපීනියන් පුවත්පත සමග සම්මුඛ සාකච්ඡාවකට එක්වෙමින් ප්‍රංශයේ චීන තානාපති ලූ ෂායේ සදහන් කර ඇත්තේ චීනය සමග සහයෝගයෙන් වැඩකිරීමට යුරෝපා සංගමය කටයුතු කළ යුතු බවයි.
ඉන්දු පැසිෆික් කලාපයේ ආරක්ෂක මැදිහත්වීම් සිදුකරනු වෙනුවට චීනය සමග ආර්ථික සහ වෙළෙද සහයෝගීතාවයෙන් යුක්තව කටයුතු කිරීම වැදගත් බව ඔහු මෙහිදී සදහන් කර තිබේ.
යුරෝපා සංගමය විසින් ඉන්දු පැසිෆික් කලාපය වෙනුවෙන් පසුගිය අප්‍රේල් මාසයේදී වෙනමම ප්‍රතිපත්ති සැලසුමක් සම්මත කරගත් අතර එහි ආරක්ෂක කටයුතු වෙනුවෙන් ප්‍රමුඛත්වයක් ලබාදී ඇත.
විදෙස් මාධ්‍ය වාර්තා කළේ ප්‍රංශයේ චීන තානාපතිවරයාගේ මෙම ප්‍රකාශයේ අරමුණු එම නව ප්‍රතිපත්තියට ප්‍රතිචාර දැක්වීම බවයි.
