සමාජ මාධ්‍ය ඔස්සේ පුද්ගලයෙකුට අපහාස කිරීම සම්බන්ධයෙන් වූ සිද්ධියකට අදාලව පුද්ගලයින් දෙදෙනෙකු පැහැරගෙන ගොස් අමානුෂික ලෙස වදහිංසා පමුණවීමේ සිද්ධියක් වාර්තා වනවා.
බලගොල්ල ප්‍රදේශයෙන් පසුගිය 25 වනදා වාර්තා වූ මෙම සිද්ධියට අදාල ප්‍රධාන සැකකරු අම්පිටිය ප්‍රදේශයේ දේවාලයක් පවත්වාගෙන යන අයෙකු බවයි පොලිස් මාධ්‍ය ප්‍රකාශක ජ්‍යෙෂ්ඨ නියෝජ්‍ය පොලිස්පති අජිත් රෝහණ මහතා පවසන්නේ.
අදාල ප්‍රධාන සැකකරුගේ මිතුරන් දෙදෙනෙකුව මෙලෙස පැහැරගෙන ගොස් ඇති බවයි පොලිසිය පවසන්නේ.
එම මිතුරන් දෙදෙනාව පැහැරගෙන ගොස් ඔවුන් දෙදෙනාව කුරුසයේ තබා ඇණ ගසා වදහිංසා පමුණවා ඇති බවයි පැවසෙන්නේ.
සිද්ධියෙන් තුවාල ලැබූ 38 සහ 44 හැවිරිදි වියේ පසුවන පුද්ගලයින් දෙදෙනා මේ වනවිට මහනුවර රෝහලේ ප්‍රතිකාර ලබන අතර ප්‍රධාන සැකකරු සහ පැහැර ගැනීම සඳහා ඔහුට සහාය වූ අනෙක් සැකකරුවන් මේ වනවිට අතුරුදන්ව සිටින බවයි පැවසෙන්නේ.
ඔවුන්ව සොයා බලගොල්ල පොලිසිය විමර්ශන ආරම්භකර තිබෙනවා.
