පකිස්තාන රජය මගින් මාධ්‍ය අධිකාරියක් ස්ථාපිත කිරීම ඇතුළුව මාධ්‍ය සම්බන්ධයෙන් කටයුතු කිරීම සදහා ගෙන ඒමට නියමිත නව නීතියට එරෙහිව රටේ ප්‍රධාන නගර ගණනාවක් ආවරණය වන පරිදි දැවැන්ත විරෝධතා පා ගමනක් පැවැත්වීමට එරට ජනමාධ්‍යවේදීහු සූදානම් වෙති.
පකිස්තාන වාර්තා සදහන් කළේ නොවැම්බර් මාසයේදී ක්වෙට්ටා, කරච්චි, මුල්ටාන්, ෆයිසලාබාද්, ලාහෝර් සහ ඉස්ලාමාබාද් යන නගර ආවරණය වන පරිදි මෙම දැවැන්ත විරෝධතා පා ගමන සංවිධානය කර ඇති බවයි.
ව්‍යාජ පුවත්වලට එරෙහිව නව නීති හදුන්වාදීමේ මුවාවෙන්, පකිස්තාන රජය මාධ්‍ය මර්දනය සදහා නව නීති හදුන්වාදීමට යන බව පකිස්තාන පෙඩරල් ජනමාධ්‍යවේදීන්ගේ සංගමයේ සභාපති ෂෙෂාඩා සුල්ෆිකාර් සදහන් කරයි.
තමන් ව්‍යාජ පුවත්වලට එරෙහිව නව නීති හදුන්වාදීමට විරුද්ධ නැතත් ඒ මුවාවෙන් මාධ්‍ය මර්දනය සදහා නීති ගෙන ඒමට විරුද්ධ බව පකිස්තාන ජනමාධ්‍යවේදී සංගම් වැඩිදුරටත් අවධාරණය කර තිබේ.
