පෞද්ගලික අංශයේ සේවකයන් විශ්‍රාම ගැන්වීමේ දැනට පවතින අවම වයස් සීමාව සංශෝධනය කිරීමට අමාත්‍ය මණ්ඩලය පසුගියදා අනුමැතිය ලබාදෙනු ලැබුවා.
සකස් කරන ලද මූලික කෙටුම්පත අග්‍රාමාත්‍යවරයාගේ ප්‍රධානත්වයෙන් පත්කර ඇති ඇඟලුම් කර්මාන්ත හා වෙළෙඳ ක්ෂේත්‍රයට බලපාන ප්‍රතිපත්තිමය හා නෛතික කරුණු පිළිබඳ අධ්‍යයනය කිරීමේ කමිටුවේ දී අදාළ සියලු පාර්ශ්වයන්ගෙන් සහභාගීත්වය ඇතිව තවදුරටත් සාකච්ඡාවට බඳුන් කරන ලදි.
එම කමිටුවේ දී එළඹී එකඟතාව පරිදි යෝජිත පනත ක්‍රියාත්මක වන දිනයේ දී වයස අවුරුදු 52 එළඹ නොමැති සේවකයන්ගේ විශ්‍රාම ගැන්වීමේ වයස අවුරුදු 60 දක්වා දීර්ඝ කිරීමටත් පනත ක්‍රියාත්මක වන දිනයේදී වයස අවුරුදු 52 හෝ ඊට වැඩි සේවකයන්ට උපරිම වශයෙන් අවුරුදු 59 දක්වා සේවයේ යෙදවීමටත් නියමිතයි.
මෙම තත්ත්වය තුළ වයස අවුරුදු 55 දී විශ්‍රාම යාමට සූදානම් සේවකයින් හට ඔවුන්ගේ අර්ථසාධක අරමුදල ආපසු ලබා ගැනීමේ හැකියාව තිබෙන්නේ වයස අවුරුදු 55 දී ද නැත්නම් 60 දී ද යන කරුණ සම්බන්ධයෙන් සමාජය තුල ගැටළුකාරී තත්ත්වයක් මතුව තිබෙනවා.
EPF මුදල් ආපසු ලබා ගත හැකි වයස් සීමාව අවුරුදු 55 බවයි මේ සම්බන්ධයෙන් අදහස් දක්වමින් ශ්‍රී ලංකා මහ බැංකු අධිපති අජිත් නිවාඩ් කබ්රාල් මහතා පවසන්නේ.
“ඕනෑම කෙනෙකුට ඕනෑම වයසක දී විශ්‍රාම යන්න පුළුවන්. සල්ලි EPF එකෙන් ගන්න පුළුවන් වෙන්නේ 55 දී. යම් පුද්ගලයෙකුට ඊට පෙර විශ්‍රාම යාමට අවශ්‍ය නම් යන්න පුළුවන්. යම්කිසි පුද්ගලයෙක් වයස අවුරුදු 60 වෙනතුරු වැඩකරනවා නම්, ඒ වයස දක්වා දැනට තියෙන නීතිය අනුව EPF ගෙවිය යුතු වෙනවා” යැයි ඔහු පවසයි.
