මුතුරාජවෙල පරිසර සංවේදී කලාපයෙන් පර්චස් හැට පන් දහස් එකසිය දෙකක භූමි ප්‍රමාණයක්, පර්චසය රුපියල් 500 බැගින් විකිණීමේ සිද්ධියක් සම්බන්ධයෙන් රජයේ ගිණුම් පිළිබඳ පාර්ලිමේන්තු කාරක සභාවේ ඉහළ අවධානය යොමුවී ඇති බව වාර්තා වනවා.
ගම්පහ ගොවිජන සංවර්ධන දෙපාර්තමේන්තු කාර්යාලයට මුදල් ගෙවා මෙම මිලදීගැනීම කර ඇති බවයි පැවසෙන්නේ.
එමෙන්ම, එම ක්‍රියාදාමය සඳහා උදව් කර ඇතැයි පැවසෙන ගම්පහ ගොවිජන සංවර්ධන දෙපාර්තමේන්තු නිලධාරීන්ට එරෙහිව කිසිදු පරීක්ෂණයක් මෙතෙක් කර නොතිබීම පිළිබඳව කෝපා කමිටුව විමතිය පළකර ඇති බවයි වාර්තා වන්නේ.
මේ සම්බන්ධයෙන් කරුණු විමසීම සඳහා එම ගොවිජන සේවා දෙපාර්තමේන්තුවේ නිලධාරීන් රාජ්‍ය ගිණුම් පිළිබඳ පාර්ලිමේන්තු කාරක සභාවට කැඳවා ඇතත් ඔවුන් පැමිණීම මග හැර ඇති අතර ඒ පිළිබඳව කෝප කමිටුව ගොවිජන සේවා දෙපාර්තමේන්තුවට දැඩි අප්‍රසාදය පළ කර ඇති බව කෝපා කමිටු වාර්තාවක සඳහන්වේ.
එමෙන්ම, අදාල පරිසර සංවේදී කලාපයට කිසිවකුට හෝ අනවසරයෙන් ඇතුළුවීමට ඉඩ නොදිය යුතු බවටත් එහි කිසිදු ගොඩ කිරීමක් නොකිරීමට වගබලා ගත යුතු බවටත් කමිටුව පරිසර අමාත්‍යාංශය ඇතුළු අදාළ ආයතනවලට උපදෙස්දී තිබෙනවා.
හෙක්ටයාර් 6232ක භූමි භාගයකින් යුතු මුතුරාජවෙල වගුරු බිමෙහි හෙක්ටයාර් 3068ක් තෙත් බිම් ප්‍රදේශයක් ලෙස සඳහන් වේ.
එසේ තෙත් බිම් ප්‍රදේශයක් ලෙස සඳහන්වී තිබියදී 2016.9.9 නිකුත් කර ඇති ගැසට් නිවේදනයක් මගින් එම ප්‍රදේශයෙන් කොටසක් නාගරික සංවර්ධන ප්‍රදේශයක් ලෙස ප්‍රකාශයට පත් කරනු ලැබ ඇති සිද්ධියක් සම්බන්ධවද රජයේ ගිණුම් පිළිබඳ පාර්ලිමේන්තු කාරක සභාවේ අවධානය යොමිමුව ඇත.
