යුද්ධය නිමා කිරීම හැරුණු කොට මෙරටට වැඩිම සේවයක් කළ මන්ත්‍රීවරයා තමන් බව පාර්ලිමේන්තු මන්ත්‍රී විජේදාස රාජපක්ෂ මහතා පවසනවා.
ඒ යූටියුබ් නාලිකාවක් සමඟ සංවාදයකට එක්වෙමින්.
තමාගේ තනි උත්සහය නොවන්නට මෙරටට ශ්‍රී ලංකා ගමනාගමන මණ්ඩලයත්, ශ්‍රී ලංකා රක්ෂණ සංස්ථාවත්, ලිට්‍රෝ ගෑස් සමාගමත් අහිමි වන්නට තිබූ බවත් ගොවි පවුල් ලක්ෂ 10කට ඉඩම් අහිමිව සිඟා කෑමට සිදුවනු ඇති බවත් ඔහු පවසනවා.
රාජපක්ෂ පවුල් පාලනය විසින් තමාව අක්‍රීය දේශපාලන චරිතයක් බවට පත් කිරීමට උත්සහයක නිරතවන නමුත් එසේ කිරීමට නොහැකි බවත් විජේදාස රාජපක්ෂ මහතා පවසනවා.
යහපාලන සමයේදී අර්ජුන් මහේන්ද්‍රන් හට මහබැංකු අධිපති ධූරය ලබාදීම සම්බන්ධවද තමා විරුද්ධ වූ නමුත් තමාගේ විරෝධය නොතකා එය සිදුකිරීම නිසා මහබැංකු කොල්ලය සිදු වූ බවත් හම්බන්තොට වරාය චීනයට දීමටද තමා විරුද්ධ වූ නිසා තමාව නෙරපූ නමුත් විසඳාගත නොහැකි ගැටළු හමුවේ නැවතත් තමාට අමාත්‍යංශ දෙකක් ලබාදුන් බවත් ඔහු පවසනවා.
ඉන්පසුව ඉන්දියාවට සහ ඇමරිකාවට රටේ විවිධ කොටස් ලබාදීමේ සැලැස්ම හමුවේ තමා යහපාලනයෙන් ඉවත්වී ශ්‍රී ලංකා පොදුජන පෙරමුණ හා එක්වූ බවයි ඔහු පවසන්නේ.
