ද්විපාර්ශ්වික වෙළඳාම සහ ආයෝජන පුළුල් කිරීමේ අවශ්‍යතාවය අවධාරණය කරමින් යුරෝපීය සංගමය සහ ඉන්දියාව අතර නිදහස් වෙළඳ ගිවිසුමක් ඇති කිරීම සඳහා වන සාකච්ඡා සඳහා ජර්මනිය සහ ඉන්දියාව පසුගියදා එකගතාවය ප්‍රකාශ කර තිබේ.
ජර්මනිය සහ ඉන්දියාව ඒකාබද්ධ ප්‍රකාශයක් නිකුත් කරමින් කියා සිටියේ සැපයුම්දාම වඩාත් විවිධාංගීකරණය වූ, වගකීම් සහගත සහ තිරසාර බවින් යුත් වෙළෙද කටයුතු පවත්වාගෙන යාම මෙහි අරමුණ බවයි.
ජාත්‍යන්තර පාරිසරික, ශ්‍රම සහ සමාජ ප්‍රමිතීන් ආරක්ෂා කරමින් සැපයුම්දාමයන්ට ආර්ථික ප්‍රතිලාභ ගෙන ඒමට ඇති හැකියාව සහතික කිරීම සඳහා එක්ව ක්‍රියා කිරීමේ අවශ්‍යතාවය රජයන් දෙකම මෙහිදී අවධාරණය කර තිබිණ.
ජර්මනිය සහ ඉන්දියාව වැදගත් වෙළඳ සහ ආයෝජන හවුල්කරුවන් වන අතර යුරෝපා සංගමය සහ ඉන්දියාව අතර නිදහස් වෙළඳ ගිවිසුමක්, ආයෝජන ආරක්ෂණ ගිවිසුමක් සහ භූගෝලීය දර්ශක පිළිබඳ ගිවිසුමක් සඳහා එළඹෙන සාකච්ඡා සඳහා දෙපාර්ශ්වයම ඔවුන්ගේ දැඩි සහයෝගය මෙහිදී ප්‍රකාශ කර ඇත.
