ඉන්දීය අදානි සමාගමේ සන්නාම තානාපතිවරයකු වූ හිටපු ක්‍රිකට් ක්‍රීඩක සවුරවු ගංගුලිට හෘදයාබාධයක් වැළඳීමෙන් අනතුරුව ඔහු පෙනී සිටි වෙළෙඳ දැන්වීම් විකාශනය නතර කිරීමට අදානි සමාගම කටයුතු කර ඇත.
විකාශය නතර කර ඇත්තේ ෆෝචූන් සන්නාමය යටතේ වෙළෙඳපොලට නිකුත් කෙරෙන නිවුඩු සහලින් සැකැසෙන්නේ යැයි කියන ආහාර පිසින තෙල් වර්ගයක වෙළෙඳ දැන්වීම්ය.
ශරීරයට අවශ්‍ය මේදය රඳවා තබා ගනිමින් රුධිරයේ කොලොස්ටෙරෝල් මට්ටම පාලනයට මෙම තෙල් සුදුසු යැයි සඳහන්ය.
කෙසේ වෙතත් 48 හැවිරිදි සවුරවු ගංගුලිගේ ධමනි තුනක සියයට 70 ක පමණ කොටසක් අවහිර වීමෙන් පසුව කල්කටාවේ රෝහලකට ඔහු ඇතුලත් කර ඇත.
සිදුවීමෙන් පසුව සමාජ මාධ්‍ය ඔස්සේ අදානි සමාගම ඉලක්ක කරගෙන විවිධ අදහස් පලවීම සමග අදාළ වෙළෙඳ දැන්වීම ඉවත්කරගැනීමට සමාගම තීරණය කර තිබේ.
ආහාර චක්‍රයේ හා ප්‍රවේණියේ ප්‍රශ්න සමග ද හෘදයාබාධ ඇති විය හැකි යැයි ද සවුරවු ගංගුලි නැවතත් ඉක්මනින්ම සිය සමාගමේ සන්නාම ප්‍රවර්ධනයට එක්වනු ඇතැයි ද අදානි පාලකයෝ පවසති.
