බැසිල් රාජපක්ෂ භීතිකාවෙන් මිදී දැන්වත් ඔහුට පාඩුවේ සිටින්නට ඉඩ ලබාදෙන්නැයි විපක්ෂයෙන් ඉල්ලා සිටින බව ශ්‍රී ලංකා පොදුජන පෙරමුණේ පාර්ලිමේන්තු මන්ත්‍රී ජානක තිසකුට්ටි ආරච්චි පවසනවා.
ඒ, ඊයේ (18) ශ්‍රී ලංකා පොදුජන පෙරමුණු මූලස්ථානයේ පැවති මාධ්‍ය හමුවක් අමතමින්.
“මං බොහොම පැහැදිලිව ඉල්ලනවා දැන්වත් බැසිල් රාජපක්ෂ භීතිකාවෙන් මිදෙන්න. මුදල් ඇමතිකමේ හිටියා, අයින් වෙන්න කිව්වා, මන්ත්‍රීකමෙනුත් අයින් වුණා. දැන් පාඩුවේ ඉන්න බැසිල් රාජපක්ෂ මැතිතුමාට පාඩුවේ ඉන්න දෙන්න. දැන් ඇති ඔය භීතිකාව. එතුමාට තියෙන බය පිළිබඳව අපි නම් ඇත්තටම ආඩම්බර වීමක් තියෙන්නෙ. මොකද ඒ තරම් බියක් තියෙන එකත් අපට ආඩම්බරයක්. සර්ව පාක්ෂික වැඩපිළිවෙල අපි ඉදිරිපත් කරලා තියෙනවා, ඒකට අංකොං තියන්න එපා. බොරු හදාගන්න එපා. බැසිල් රාජපක්ෂ මැතිතුමාට නෙලනෙලා ඉන්නෙ නැතුව, පොහොට්ටුවට නෙලනෙලා ඉන්නෙ නැතුව … – අපි තමයි ලොකුම කැපකිරීම කරලා තියෙන්නෙ පොහොට්ටුව විදියට. ජනාධිපතිකමත් දීලා, අගමැතිකමත් දීලා, ඇමතිකම් ටිකත් දීලා, බහුතරේ තියාගෙන තවමත් – මේ සියල්ල කැපකරලා තියෙන්නෙ”
