ශ්‍රී ලංකා තුන් ඉරියව් ක්‍රිකට් ක්‍රීඩක චාමික කරුණාරත්නහට වසරක ක්‍රිකට් තහනමක් පැනවීමට පනවා තිබෙනවා.
ඒ ඕස්ට්‍රේලියාවේ පසුගියදා පැවැති පන්දුවාර 20 ලෝක කුසලානය ක්‍රිකට් තරඟාවලියේ දී ක්‍රීඩක විනය නීති උල්ලංඝනය කිරීම සම්බන්ධයෙන් ඔහුට එරෙහිව එල්ලවූ සියලු චෝදනාවලට ඔහු වැරදිකරු වීම හේතුවෙන්.
මෙම චෝදනා විමර්ශන කිරීමට ත්‍රිපුද්ගල කමිටුවක් පත් කළ අතර එම ත්‍රිපුද්ගල කමිටුව ශ්‍රී ලංකා ක්‍රිකට් විධායක කමිටුව වෙත නිර්දේශ කර ඇත්තේ චාමික කරුණාරත්න උල්ලංඝනය කර ඇති ක්‍රීඩක ගිවිසුම් කොන්දේසි බරපතළ තත්ත්වයේ පවතින බවයි.
මෙමඟින් ඔහුගේ ක්‍රීඩා දිවියට දැඩි බලපෑමක් ඇති නොවන ලෙස දඬුවමක් පැනවීම සුදුසු බවයි එම කමිටුව ක්‍රිකට් විධායක කමිටුව වෙත නිර්දේශ කර ඇත්තේ.
ඒ අනුව ශ්‍රී ලංකා ක්‍රිකට් විධායක කමිටුව තීරණය කර ඇත්තේ චාමික කරුණාරත්න හට සියලු මාදිලියේ ක්‍රිකට් තරඟ සඳහා වසරක තහනමක් පැනවිමටයි.
මෙම තහනම වසරක කාලයක් සඳහා අත්හිටුවනු ලැබූ එකක් වන අතර ඊට අමතරව ඔහුට ඇමෙරිකානු ඩොලර් 5000ක දඩ මුදලක් පැනවීමටත් ශ්‍රී ලංකා ක්‍රිකට් විධායක කමිටුව තීරණය කර තිබෙනවා.
ඒ අනුව ක්‍රිකට් ආයතනය නිකුත් කළ නිවේදනයේ වැඩිදුරටත් සඳහන් වන්නේ අත්හිටවූ තරග තහනම පැනවූ කාලය තුළ චාමිකට ක්‍රිකට් ක්‍රීඩා කිරීමට කිසිම බාධාවක් නොවන බවයි.
කෙසේ වෙතත් චාමික කරුණාරත්න හට පනවා ඇති මෙම වසරක පරිවාස කාලය තුළ දී නැවතත් ක්‍රීඩක ගිවිසුම් සහ විනය විරෝධී හැසිරීම්වල නිරත වුවහොත් ඔහුට එරෙහිව පනවා අත්හිටුවා ඇති වසරක සියලුම මාදිලියේ ක්‍රිකට් තහනම බලපැවැත්වෙනු ඇති.
