ආන්දෝලනයට තුඩුදී ඇති වේයන්ගොඩ – දාරළුව ප්‍රදේශයේ ඇති කෲඩියා සිලනිකා ශාඛය රැකගැනීමට ඉදිරිපත්වූ ගම්පහ දිසා වන අඩවි නිලධාරිනී දේවානි ජයතිලක මහත්මියට චෝදනා රැසක් ඉදිරිපත්ව ඇතැයි වනජීවී හා වන සම්පත් අමාත්‍යාංශයේ ලේකම් බන්දුල හරිස්චන්ද්‍ර මහතා පවසනවා.
වදවීමේ තර්ජනයට මුහුණපා ඇති නිසාවෙන් රතු දත්ත පොතට පවා ඇතුළත්ව ඇති කෲඩියා සිලනිකා ශාඛයකට හානි කිරීම වැළැක්වීම හේතුවෙන් යළිත් වරක් දිසා වන අඩවි නිලධාරිනි දේවානි ජයතිලක මහත්මිය පිළිබදව කතා බහක් ඇතිවුණා.
අමාත්‍යංශයේ ලේකම්වරයා සදහන් කරන්නේ අදාල ශාඛය පිළිබදව කටයුතු කරනු ලබන්නේ වනජීවී හා වෘක්ෂලතා පනතේ 42 වන වගන්තියේ 8 වන උපලේඛනයේ ප්‍රතිපාදනයන්ට අනුව වනජීවී සංරක්ෂණ දෙපාර්තමේන්තුව බවයි.
ඒ අනුව දේවානි ජයතිලක මහත්මිය දිසා වන නිලධාරිනියක් බවත් ඇය තමන්ට අදාල නොවන කාර්යයකට මැදිහත්වී ඇති බවත් ලේකම්වරයා පවසනවා.
අමාත්‍යාංශ ලේකම් බන්දුල හරිස්චන්ද්‍ර මහතා සදහන් කරන්නේ වන සංරක්ෂක නිලධාරියෙක් වෙනත් පනතක කටයුත්තකට මැදිහත් නොවිය යුතු බවයි.
එමෙන්ම රාජ්‍ය නිලධාරිනියක් වශයෙන් ගැටුම් කළමණාකරණය කරනවා විනා ගැටුම් ඇති කිරීමේ තත්ත්වයක් ඇති නොකල යුතු බවද ඔහු සදහන් කරනවා.
එවන් තත්ත්වයක් පවතින ස්ථානයකට දිසා වන නිලධාරිනිය යන්නේ නම් තමන්ට ඉහළ නිලධාරීන් හට අදාල සිදුවීම පිළිබදව දන්වා යා යුතු බවත්, සිදුවීම පවත්නා ස්ථානයේ සිට මාධ්‍ය වෙත ලබාදෙන ප්‍රකාශය කුමක්දැයි යන්න තම ඉහළ ප්‍රධානීන් දැනුවත් කල යුතුව තිබූ බවත් ලේකම්වරයා පවසනවා.
ඒ අනුව දේවානි ජයතිලක මහත්මිය සම්බන්දයෙන් වන සංරක්ෂකවරයා යම් පියවරක් ගැනීමට නියමිතව ඇති බවද ඔහු වැඩිදුරටත් සදහන් කළා.
