අත්‍යාවශ්‍ය නොවන ශල්‍යකර්ම කෙටි කාලයක් සඳහා කල් දැමීමට තීරණය කළ බව කැබිනට් ප්‍රකාශක ආචාර්ය බන්දුල ගුණවර්ධන මහතා පවසනවා.
කැබිනට් මාධ්‍ය හමුවකට අද (14) එක්වෙමින් ඔහු මේ බව කියා සිටියා.
අමාත්‍යවරයා සඳහන් කළේ ශල්‍යකර්ම සඳහා අවශ්‍ය උපකරණ සහ ඖෂධ ගෙන ඒමට මුදල් නොමැතිකම මත මෙම තීරණය ගෙන ඇති බවයි.
“මම කියන්නේ ඔය විධියට ඇමතිවරයාට හෝ එහෙම පුද්ගලිකව තීන්දු තීරණ ගන්න බෑ ආණ්ඩුකරණයේදී.
ශල්‍යකර්මයක් පමා කරනවා කියන එක ඉතා ම ගැඹුරින් ගන්න තීරණයක්. එහෙම ගන්න වෙලා තියෙන්නේ ඒක කරන්න අවශ්‍ය කරන උපකරණ හා ඖෂධ ගේන්න මුදල් නොමැතිකම නිසා. නැත්නම් මේ නැව ගෙනැල්ලා නැව තියෙනකොට ඒ නැවට පමා ගාස්තු ගෙවන්න සිද්ධ වෙනකොට දඩ මුදල් ගෙවන්න වෙනකොට ඇයි නැව ගන්නේ නැත්තේ ගල් අඟුරු ටික? මුදල් නැති නිසා.
මේක හොයන්න වෙන මුදල්වලට වෙන විකල්ප ක්‍රමයක් නෑනේ. ඔබයි මමයි මුදල් ප්‍රශ්නයකට මුහුණ දුන්නා ම, ආදායම තියෙනවා, වියදම නෑ. ණයට ගන්න කෙනෙකුත් නෑ. කවුරුත් ණය දෙන්නෙත් නෑ. එතකොට කොහොම ද ඒ, මොකක් හරි දෙයකින් කැප කිරීමක් කරනවා හැර වෙන විකල්පයක් තියෙනවා ද? තියෙනවා නම් ඒ විකල්පයට අපිට කරතහැකිනේ රජයක් ලෙස.”
මේ අතර අත්‍යාවශ්‍ය සහ හදිසි සෞඛ්‍ය සේවාවන් බාධාවකින් තොරව පවත්වාගෙන යාම තහවුරු කිරීම සඳහා ජපානයෙන් ඩොලර් මිලියන 38ක ප්‍රදානයක් ලබාදීමට ජපාන රජය කැමැත්තත පළකර කර තිබෙනවා.
කැබිනට් තීරණ දැනුම්දීමේ මාධ්‍ය හමුවට එක්වෙමින් කැබිනට් මාධ්‍ය ප්‍රකාශක අමාත්‍ය බන්දුල ගුණවර්ධන මහතා මේ බව කියා සිටියා.
“අත්‍යවශ්‍ය සේවා සහ ප්‍රවාහන පහසුකම් තහවුරු කරමින් ශ්‍රී ලංකාවේ සෞඛ්‍ය අංශයේ සෞඛ්‍ය සේවා සැපයුම් පද්ධතිය වැඩිදියුණු කිරීම සඳහා ජපාන ආර්ථික හා සමාජ සංවර්ධන වැඩසටහන යටතේ ජපන් යෙන් බිලියන 5ක ප්‍රදානයක් ආසන්න වශයෙන් අමෙරිකානු ඩොලර් මිලියන 38ක ප්‍රදානයක් ලබාදීමට ජපන් රජයේ එකඟතාව පළකරලා තියෙනවා.
ශ්‍රී ලංකාවේ පවතින වර්තමාන ආර්ථික අර්බුදය සැලකිල්ලට ගෙන ජපාන ආර්ථික හා සමාජ සංවර්ධන වැඩසටහන යටතේ අත්‍යවශ්‍ය සහ හදිසි සෞඛ්‍ය සේවාවන් බාධාවකින් තොරව පවත්වාගෙන යාම තහවුරු කිරීම පිණිස ඉන්ධන ප්‍රධාන වශයෙන් ඩීසල් සැපයීම් සඳහා තමයි මේ ප්‍රදානය ලබාදීලා තියෙන්නේ.”
