ත්‍රිකුණාමල තෙල් ටැංකි සම්බන්ධයෙන් බලශක්ති අමාත්‍ය උදය ගම්මන්පිල මහතා ජනමාධ්‍යට දැක් වූ අදහස් ගැන ඉන්දීය මහකොමසාරිස් කාර්යාලය කනස්සල්ලෙන් පසුබව බව විශ්වසනීය ආරංචි මාර්ග ප්‍රකාශ කරයි.
ඊට හේතු වී ඇත්තේ අදාළ තෙල් ටැංකි මුළුමනින්ම ශ්‍රී ලංකාව සතු වන බවට ප්‍රචාරක මෙහෙයුමක් දියත් වීම බව පැවැසේ.
කෙසේ වෙතත් එම තෙල් ටැංකි සංවර්ධනය හා මෙහෙයුම් කටයුතු දැනට පවතින ද්විපාර්ශ්වීය අවබෝධතා සහ 2017 වසරේ අත්සන් තැබුණු අවබෝධතා ගිවිසුම පදනම් කරගනිමින් කිරීමට ඉන්දීය පාර්ශ්වය සූදානම් බව රජයේ ප්‍රකාශකයෙක් ‘නිව්ස් 19’ ට පැවැසීය.
මෙම වැරැදි සන්නිවේදනය සම්බන්ධයෙන් ඉන්දීය මහකොමසාරිස් කාර්යාලය බලශක්ති අමාත්‍යවරයා දැනුම්වත් කර ඇත.
ඉන්දියාවටත් ලංකාවටත් එක සේ ප්‍රතිලාභ ලැබෙන මාදිලියක් ගැන ඉන්දීය පාර්ශ්වයේ අවධානය යොමු වී ඇති බවත් ඊට අදාළ නිල සාකච්ඡා කඩිනමින් ආරම්භ වනු ඇති බවත් එම ප්‍රකාශකයා වැඩිදුරටත් සඳහන් කළේය.
