19 වන ආසියානු ක්‍රීඩා උළෙලේ ඊයේ (28) පැවැති තරඟවලදී නව ජාතික වාර්තාවක් පිහිටුවීමට පිහිනුම් ක්‍රීඩක මැතිව් අබේසිංහ සමත් වී තිබෙනවා.
ඒ, මීටර් 50 සමනල ආර පිහිනුම් ඉසව්ව තත්පර 24.58 කින් නිම කරමින්.
කෙසේවෙතත්, ඔහුට එම තරඟ ඉසව්වෙන් 6 වැනි ස්ථානය හිමිව තිබුණා.
මේ වන විට සත්කාරක චීනය පදක්කම් සටහනේ පෙරමුණ ගෙන සිටි අතර එක් රිදී පදක්කමක් දිනූ ශ්‍රී ලංකාව පදක්කම් සටහනේ 25 වන ස්ථානයේ රැදී සිටින බව වාර්තා වෙනවා.
මේ අතර, ශ්‍රී ලංකාව පදක්කම් පිලිබද බලාපොරොත්තු තබාගෙන සිටින මලල ක්‍රීඩා ඉසව්වල මූලික වටයේ තරඟ අද ආරම්භ වෙනවා.
ඒ අනුව, ශ්‍රී ලාංකික ක්‍රීඩකයන් වන නදීෂා රාමනායක, කාලිංග කුමාරගේ සහ අරුණ දර්ශන අද තරඟ බිමට පිවිසීමට නියමිතයි.
මෙම ක්‍රීඩකයින් තිදෙනාම මීටර් 400 ඉසව්ව නියෝජනය කරන අතර, නදීෂා රාමනායක සහභාගී වන කාන්තා මූලික වටයේ දෙවැනි තරඟය මෙරට වේලාවෙන් පස්වරු 4.38ට ආරම්භ වෙනවා.
කාලිංග කුමාරගේ මීටර් 400 පිරිමි මූලික වටය පස්වරු 5.10 ට ආරම්භ වන පළමු තරඟය වන අතර අරුණ දර්ශන එම ඉසව්වේ මූලික වටයේ තෙවැනි තරඟයට සහභාගී වීමට නියමිතයි
