කපුගොල්ලෑව පොලිස් වසමේ අලියාකඩ ප්‍රදේශයේ නිවසක තිබෙන කැසට් යන්ත්‍රය අධික ශබ්දයක් නැගෙන අයුරින් ක්‍රියාත්මක නොකරන ලෙස අවවාද කළ කපුගොල්ලෑව පොලීසියේ ස්ථානාධිපතිවරයාට සහ පොලිස් සැරයන්වරයකුට ඊයේ (09) උදෑසන කාලයේදී පුද්ගලයින් තිදෙනෙක් පහරදී තිබෙනවා.
පහර දුන් බව කියන එකම පවුලේ 17 හැවිරිදි පාසල් සිසුවකු ඇතුළු සහෝදරයන් තිදෙනකු අත්අඩංගුවට ගැනීමට හොරොව්පොතාන පුගොල්ලෑව පොලීසිය මේ වන විට පරීක්ෂණ පවත්වනවා.
මෙම සැකකාර සහෝදරයන් තිදෙනා මේ වන විටත් ප්‍රදේශය අතහැර පලා ගොස් ඇති බවයි වාර්තා වන්නේ.
පසුගියදා විහාරස්ථානය ආසන්නයේ පිහිටි නිවසක ක්‍රියාත්මක කර ඇති කැසට් යන්ත්‍රය මගින් නිකුත් වන අධික ශබ්දය උහුලා ගැනීමට නොහැකි බවත් මේ නිසා විහාරස්ථානයේ ආගමික කටයුතුවලට පවා මහත් බාධාවක් සිදුවී තිබෙන බවත් පවසමින් පිරිසක් කපුගොල්ලෑව පොලිසියට දුරකතනයෙන් පැමිණිල්ලක් ඉදිරිපත් කර තිබෙනවා.
පොලිස් කණ්ඩායමක් මේ ගැන සොයා බැලීමට ගොස් කැසට් යන්ත්‍රයේ ශබ්දය අඩු කරන ලෙස දාහත් හැවිරිදි පාසල් සිසුවාට දැනුම් දුන් අවස්ථාවේ ඔහු එම දැනුම්දීම කළ පොලිස් සැරයන්වරයාට අතින් පහර දීමක් සිදු කළේ යැයි පොලිසිය පවසනවා.
මෙම පහරදීමෙන් පොලිස් සැරයන්වරයාගේ තොල් පුපුරා තුවාල සිදුවී ඇතැයි පොලිසිය සඳහන් කරනවා.
පසුව මෙම සිදුවීම වු හොරොව්පොතාන – කපුගොල්ලෑව – අලියාකඩ ප්‍රදේශයේ අදාළ නිවසට කපුගොල්ලෑව පොලිස් ස්ථානාධිපතිවරයා ගොස් ඇති අතර එහිදී ඔහු පොලිස් ජිප් රථයෙන් බැස නිවස වෙත එමින් සිටි අතරවාරයේ දහහත් හැවිරිදි සිසුවාගේ සහෝදරයන් දෙදෙනා පොලිස් ස්ථානාධිපතිවරයාට පොලු පහර කිහිපයක් එල්ල කර පලා ගොස් තිබෙනවා.
පොලීසිය පවසන්නේ මෙම 17 හැවිරිදි පාසල් සිසුවාගේ සහෝදරයන් දෙදෙනා කසිප්පු පෙරා විකිණීමේ ජාවාරමක නිරතව සිටින බවයි.
එම සොහොයුරන් තිදෙනාට අමතරව එම ස්ථානයට තවත් බාහිර පිරිසක් පැමිණ කපුගොල්ලෑව පොලිස් ස්ථානයේ නිලධාරින් දෙදෙනෙකුටද පහරදී රාජකාරියට බාධා කළ බව පොලීසිය පවසනවා.
එසේ අයුතු ජනරාශියකින් අනුබල දී රාජකාරියට බාධා කර ඇත්තේ, අවුරුදු 21, 23 සහ 24 වයස්වල පසුවන අලියාකඩ ප්‍රදේශයේ පදිංචිකරුවන් තිදෙනෙක් වන බවත් ඔවුන්ව අත්අඩංගුවට ගත් බවත් පොලීසිය සදහන් කරනවා.
පහරකෑමෙන් තුවාල ලබූ පොලිස් නිලධාරින් කපුගොල්ලෑව රෝහලේ ප්‍රතිකාර ලබන ලබනවා.
සැකකරුවන් අද (10) කැබිතිගොල්ලෑව මහෙස්ත්‍රාත් අධිකරණය වෙත ඉදිරිපත් කර ඇති අතර සිද්ධිය සම්බන්ධයෙන් හොරොව්පතාන පොලීසිය වැඩිදුර විමර්ශන සිදුකරනු ලබනවා.
