වෙළඳ අමාත්‍යවරයා වශයෙන් කටයුතු කරමින් සිටියදී සතොස ආයතනයේ සේවකයින් ඔවුන්ගේ රාජකාරිවලින් ඉවත් කර දේශපාලන කටයුතුවල යෙදවීම තුළින් රජයට පාඩුවක් සිදු කළ බවට චෝදනාකොට හිටපු අමාත්‍ය ජොන්ස්ටන් ප්‍රනාන්දු මහතා ඇතුළු විත්තිකරුවන් තුන්දෙනෙක් එරෙහිව අල්ලස් කොමිසම විසින් ගොනු කර තිබෙන නඩුව පවත්වාගෙන යාමට නොහැකි බවට විත්තිය විසින් මතුකළ මූලික විරෝධතාව කොළඹ මහාධිකරණ විනිසුරු නවරත්න මහතා අද ප්‍රතික්ෂේප කළා.
ඒ අනුව අදාළ නඩුව ජුලි මස 20 වනදා විභාගයට ගැනීමටත් අධිකරණය දින නියම කළා.
මෙම නඩුවට අදාල විමර්ශන සඳහා අල්ලස් කොමිසමේ කොමසාරිස්වරු තුන්දෙනාගේ අනුමැතිය හිමිවී නොමැති බැවින් එම නඩුව පවරා පවත්වාගෙන යාමට නොහැකි බවට විත්ති පාර්ශ්වය විසින් මූලික විරෝධතා මතු කර තිබුනා.
එහෙත් එම මූලික විරෝධතාව ප්‍රතික්ෂේප කළ මහාධිකරණ විනිසුරුවරයා අදාළ නඩුව විභාගයට ගැනීම සඳහා දින නියම කළා..
මෙම නඩුවේ සෙසු විත්තිකරුවන් ලෙස සතොස ආයතනයේ හිටපු සභාපති එරාජ් ප්‍රනාන්දු සහ එහි හිටපු අධ්‍යක්ෂ වරයෙකු වන මොහොමඩ් සාකීර් නම් කර තිබෙනවා.
මෙම චෝදනාව සම්බන්ධයෙන්ම හිටපු අමාත්‍ය ජොන්ස්ටන් ප්‍රනාන්දු මහතා ඇතුළු විත්තිකරුවන් තුන් දෙනෙකුට එරෙහිව අල්ලස් කොමිසම ගොනුකර තිබෙන තවත් නඩුවක් ජුලි මස 20 වන දා විභාගයට ගැනීමටත් කොළඹ මහාධිකරණ විනිසුරු ආදිත්‍ය පටබැඳී මහතා නියෝග කළා.
2010 වසරේ සිට 2014 වසර දක්වා කාලසීමාව තුළ වෙළඳ අමාත්‍යවරයා වශයෙන් කටයුතු කරමින් ස.තො.ස ආයතනයේ සේවකයින් ඔවුන්ගේ නිල රාජකාරිවලින් ඉවත් කර දේශපාලන කටයුතුවල යෙදවීම තුළින් අල්ලස් පනත යටතේ දූෂණය නැමැති වරද සිදුකළ බවට චෝදනා කරමින් හිටපු ඇමති ජොන්ස්ටන් ප්‍රනාන්දු මහතා ඇතුළු විත්තිකරුවන් තිදෙනාට එරෙහිව අල්ලස් කොමිසම නඩු පවරා තිබෙනවා.
