යුරෝපා සංගමයේ ශ්‍රී ලංකා තානාපතිනිය වන කාමෙන් මොරෙනෝ සහ ජාතික ජන බලවේගයේ නායක අනුර කුමාර දිසානායක මහතා අතර හමුවක් සිදුව තිබෙනවා.
අද (13) පස්වරුවේදී එම හමුව සිදුව ඇත්තේ ජනතා විමුක්ති පෙරමුණේ බත්තරමුල්ල, පැලවත්ත පිහිටි මූලස්ථානයේදීයි.
ශ්‍රී ලංකාවේ ආර්ථික අර්බුදය සහ පවතින දේශපාලන තත්වය පිළිබඳව මෙහිදී සාකච්ඡාවට බඳුන්වූ බවයි වාර්තා වන්නේ.
ශ්‍රී ලංකාවේ මානව හිමිකම් ආරක්ෂා කිරීම, ප්‍රජාතන්ත්‍රවාදය ආරක්ෂා කිරීම මෙන්ම මැතිවරණ කල් දැමීම ගැනද ඔවුන්ගේ අවධානයට ලක්වූ බව සඳහන් වනවා.
එමෙන්ම මාර්ගගත ක්‍රමවල සුරක්ෂිතභාවය පිළිබඳ පනත (Online Safety bill) පිළිබඳවද මෙම සාකච්ඡාවේදී අවධානයට ලක්වූ අතර දෙපාර්ශ්වය අතර සබඳතා ශක්තිමත් කරගැනීම පිළිබඳවද සාකච්ඡා කර තිබෙනවා.
මෙම හමුව සඳහා යුරෝපා සංගමයේ ශ්‍රී ලංකා නියෝජිත පිරිසේ නියෝජ්‍ය ප්‍රධානි ලාර්ස් බ්‍රෙඩාල් (Lars Bredal) සහජාතික ජන බලවේගයේ ජාතික විධායක සභික විජිත හේරත් මහතාද එක්වී සිටියා.
