ගලහ, නිල්ලඹ යෝගලෙච්චමී වත්තේදී ඊයේ (12) පුද්ගලයෙක් සිය බාල සොහොයුරාව තියුණු ආයුධයකින් පහරදී ඝාතනය කර තිබෙනවා.
මෙලෙස සිය සොහොයුරාව ඝාතනය කර ඇත්තේ, ඉඩම් ආරවුලක් මුල් කරගනිමින්.
එහිදී ඝාතනයට ලක්වී ඇත්තේ 35 හැවිරිදි ක්රිෂ්ණසාමී කරුණානිධි නම් පුද්ගලයෙක්.
ඔහුගේ සොහොයුරා වන ඒසුදාසන් තිදරු පියෙකු වන අතර ඔහු කලක් බන්ධනාගාරගතව සිට නිදහස ලබා අනුරාධපුරයේ තනිව ජීවත්වෙමින් සිටි පුද්ගලයෙක් බවයි වාර්තාවන්නේ.
ඒ අතරතුර සිය පියාට අයත් ඉඩමක් සිය අවිවාහක සොහොයුරා විකුණා ඇති බවට සැළවීමත් සමග ඔහු ඉකුත් බ්රහස්පතින්දා රාත්රියේ කරුණානිධිගේ නිවසට පැමිණ ආරවුලක් ඇති කරගෙන තිබෙනවා.
අසල්වැසියන් පවසන්නේ, රාත්රිය පුරා පැවති ගැටුමෙන් පසු ඊයේ අලුයම 2 පමණ සිට පැවති නිහඬතාවය සම්බන්ධයෙන් සැක සිතී ඒ පිළිබඳව සෝදිසි කිරීමේදී තුවාල සහිතව දෑත් ගැටගසා බිම වැටී තිබූ කරුණානිධිගේ මළ සිරුර දුටු බවයි.
මුගුරු, තියුණු ආයුධ, ගල් සහ වීදුරු බෝතල්වලින් පහරදී මෙම ඝාතනය සිදුකර තිබෙන බවට සාක්ෂි හමුවී තිබෙනවා.
එහිදි සොහොයුරාට පහරදී පළායමින් සිටි ඒසුදාසන් නමැති පුද්ගලයා අසල්වැසියන් විසින් අල්ලා ගලහ පොලීසියට භාරදී තිබුණා.