ප්‍රවාහන හා මහාමාර්ග අමාත්‍ය ආචාර්ය බන්දුල ගුණවර්ධන මහතාගේ ප්‍රධානත්වයෙන් හෝමාගම පිටිපන හන්දිය ආසන්නයේ අභිනවයෙන් ඉදි කෙරෙන බුද්ධ මන්දිරයකට මුල්ගල් තබන අවස්ථාවේදී හූ හඩ නගා විරෝධතාවයක් දැක්වූ පුද්ගලයෙක් හඹා ගොස් අත්අඩංගුවට ගෙන තිබෙනවා.
හෝමාගම පොලීසිය සඳහන් කළේ මෙලෙස අත්අඩංගුවට පත්ව ඇත්තේ හෝමාගම පිටිපන උතුර ප්‍රදේශයේ පදිංචි 43 හැවිරිදි ව්‍යාපාරිකයෙක් බවයි.
අදාළ පුද්ගලයා හෝමාගම දෙස සිට හයිලෙවල් මාර්ගය ඔස්සේ මොරගහහේන දෙසට සිය ලොරි රථයකින් යමින් සිටි අවස්ථාවේ දී පිටිපන හන්දියේ බන්දුල ගුණවර්ධන අමාත්‍යවරයාගේ සහභාගීතත්වයෙන් උත්සවයක් පවත්වා තිබෙනවා.
ඔහු එහිදී හූ හඬ නගමින් ඇමතිවරයා ඇතුළු පිරිසට විරෝධතාව දක්වමින් පලා ගොස් ඇති බවයි වාර්තා වන්නේ.
පසුව පොලීසිය එම ලොරි රථය හඹා ගොස් එම පුද්ගලයා අත්අඩංගුවට ගෙන ඇති අතර සනාදරය ඇති කිරීම, ආගමික උත්සවයකට බාධා කිරීම, ආගම ඇදහීමට ඇති අයිතියට අභියෝග කිරීම යන චෝදනා යටතේ හෝමාගම අධිකරණය හමුවේ ඉදිරිපත් කිරීමට නියමිතයි.
සිද්ධිය සම්බන්ධයෙන් හෝමාගම පොලීසිය වැඩිදුර පරීක්ෂණ සිදු කිරීමට නියමිතයි.
