දරුවන්ගේ අධ්‍යාපනය සම්බන්ධයෙන් ජනාධිපතිවරයාගේ සහ අග්‍රාමාත්‍යවරයාගේ අවධානය යොමුවිය යුතු බව ආදිවාසි නායක ඌරුවරිගේ වන්නිලඇත්තෝ පවසනවා.
ඊයේ (12) දිනයේදි මාධ්‍ය වෙත අදහස් දක්වමින් වන්නිලඇත්තන් පවසා සිටියේ අධ්‍යාපනය ලබන දරුවන් පත්ව ඇති තත්වය පිළිබඳව අවධානය යොමු කොට ඔවුන්ගේ අනාගතය සම්බන්ධයෙන් මැදිහත් වීමක් සිදුකළයුතුව ඇති බවයි.
මෙහිදී වැඩිදුරටත් අදහස් දැක්වු ඌරුවරිගේ වන්නිලඇත්තෝ,
“පාසල්වල ඉගෙන ගන්නා දරු දැරියෝ හැමෝටම මේ රටේ කොවිඩ් වසංගතය හේතුවෙන් අධ්‍යාපනය කියන එක මඟ ඇරිලා තියෙන කාලයක් මේක. මගේ ඇස් දෙකට මම දැකලා තියෙනවා ළමයි ගොඩදෙනෙක් මහන්සි වෙනවා රෑ දවල් නොබලා. ඒ අය කඳු නඟිනවා. ගල් උඩ නඟිනවා. ගස් උඩ මැස්සවල් ගහගෙන ඉන්නවා. ඇත්තටම ඒ වැඩේ උනත් සමහර තැන්වල ගෙදර ඉදලා දුරකථන භාවිත කරලා ඉගෙන ගන්න බැරි තත්වයක් තියෙන්නේ.
සමහර තැන්වල දුරකථන සංඥා තියෙන ස්ථාන වල ඒ ක්‍රමය සාර්ථක වුණා. දුරකථන සංඥා නොමැති සමහර තැන්වල කරදරවෙලා දුක්වෙලා ළමයි ඉගෙන ගන්නවා.
දැන් මට දැනගන්න ලැබෙනවා පහුගිය දිනවල කොළඹ පැත්තේ මිනිස්සුන්ගේ ඉල්ලීම් ලබාදෙන ලෙස උද්ඝෝෂණයක් එතැනදී ඒ අය අල්ලලා නිරෝධානයට අරන් ගිහිල්ලා සිද්ධියක් වෙලා තියෙනවා. ඒක මූලික කරගෙන දුරකථනවලින් උගන්නපු ගුරුවරු නිවෙස්වලට වී ඉගෙන ගන්න දරුවන්ට ඉගැන්වීම් කටයුතු වලින් ඉවත් වෙනවා කියලා මට දැන ගන්න ලැබුනා.
එහෙම වුනොත් ඇත්තටම අපේ රටේ ඉදිරි කාලේ දී මේ රට භාරගන්න ඉන්න දරුදැරියෝ අසරණ වෙනවා. ඒ හින්ද මම කියන්නේ මේ රට පාලනය කරන ජනාධිපතිවරයා හෝ අගමැතිවරයා මේ ගැටලු ගැන මීට වැඩිය හිතට අරගෙන හොයලා බලන්න ඕන කියලයි. මේ දරු දැරියෝ ගැන හිතලා මේ ගැටලුවට මැදිහත් වෙලා, දරුවන්ගේ අනාගතගැන සැල කිල්ලට ගෙන සාධාරණ විසදුමක් ලබාදී, මේක විසඳලා දෙන්න කියලා මම ඉල්ලා සිටිනවා“
