වහාම ආක්‍රමණ නවත්වා ඵලදායී සාම සාකච්ඡා ක්‍රියාවලියකට එලඹෙන ලෙස එක්සත් ජාතීන්ගේ සංවිධානයේ මහලේකම් ඇන්තෝනියෝ ගුටරෙස් තලේබාන් සංවිධානයෙන් ඉල්ලීමක් කර තිබේ.
ඇෆ්ගනිස්තානයේ සහ එහි වැසියන්ගේ,යහපත වෙනුවෙන් ගත හැකි හොදම සහ ඵලදායීම ක්‍රියාව එය බව එක්සත් ජාතීන්ගේ මහලේකම්වරයා මෙහිදී අවධාරණය කර ඇත.
සිය මූලස්ථානයේදී මාධ්‍ය අමතමින් ඔහු සදහන් කර ඇත්තේ ඇෆ්ගනිස්තානයේ නීත්‍යානුකූල පාලනය බිද වැටෙමින් ඇති බවත් ,එරට මානුෂීය අර්බුදය පැයෙන් පැය උග්‍ර වෙමින් ඇති බවත්ය.
සිවිල් වැසියන් මියයාම, තුවාල ලැබීම සහ අවතැන්වීම දැඩි ලෙස ඉහළ ගොස් ඇති බවත් කාන්තා අයිතිවාසිකම් දැඩි ලෙස සීමාවී ඇති බවත් මේ සියල්ල මහත් ඛේදවාචකයක් බවත් එක්සත් ජාතීන්ගේ මහලේකම්වරයා වැඩිදුරටත් සදහන් කර ඇත.
