බස්නාහිර හා සබරගමුව පළාත්වල වාර විභාග ප්‍රශ්න පත්‍ර පිටවීමේ සිද්ධිය සම්බන්ධයෙන් අද (04) විශේෂ සාකච්ඡාවක් පැවැත්වනු ලබනවා.
ඒ, අදාළ පළාත්වල අධ්‍යාපන බලධාරීන්ගේ සහභාගීත්වයෙන්.
ප්‍රශ්න පත්‍ර ගැටලුව සම්බන්ධයෙන් අද රාජ්‍ය මුද්‍රණ නීතිගත සංස්ථාව සමගද සාකච්ඡා පවත්වන බව බස්නාහිර පළාත් අධ්‍යාපන අමාත්‍යාංශයේ ලේකම් සිරිසෝම ලොකුවිතාන මහතා සඳහන් කළා.
සබරගමුව පළාත් අධ්‍යාපන ලේකම් චාමර බමුණු ආරච්චී මහතා පැවසුවේ, සබරගමුව පළාතේ ද 10 ශ්‍රේණිය ඉංග්‍රිසි දෙවන ප්‍රශ්න පත්‍රය පිටවීම පිළිබඳව ද විධිමත් පරීක්ෂණයක් ආරම්භ කෙරෙන බවයි.
ඔහු සඳහන් කළේ, මේ වනවිට 10 ශ්‍රේණිය ඉංග්‍රිසි දෙවන ප්‍රශ්න පත්‍රය නැවත සකස් කර ඇති බවයි.
එය එළඹෙන බදාදා දින සිසුන්ට පෙර පරිදි විභාහගයක් පවත්වා ලබා දෙන බව ඔහු වැඩිදුරටත් සඳහන් කළා.
මේ අතර, මධ්‍යම පළාතේ අවසාන වාර විභාග පරීක්ෂණ සඳහා ලබා දෙන ප්‍රශ්න පත්‍ර ද විභාගයට පෙර පිටවී ඇත්දැයි සෙවීමට කලාප අධ්‍යාපන අධ්‍යක්ෂකවරුන්ට උපදෙස් දුන් බව මධ්‍යම පළාත් අධ්‍යාපන අධ්‍යක්ෂකවරයා සඳහන් කළා.
ඔහු සඳහන් කළේ, මෙතෙක් එවැනි සිදුවීමක් වාර්තා වී නොමැති බවයි.
කෙසේ වෙතත් පාසල් වාර විභාග ප්‍රශ්න පත්‍ර සමාජ මාධ්‍යය ඔස්සේ නිකුත් වීම සම්බන්ධයෙන් මේ වනවිට අපරාධ පරීක්ෂණ දෙපාර්තමේන්තුව විමර්ශනයක් ආරම්භ කර තිබෙනවා.
