පාර්ලිමේන්තු කාරක සභා රැස්වීමකට බාහිර පාර්ශවයක් කැඳවන්නේ නම් ඒ සඳහා කථානායකවරයාගේ පූර්ව ලිඛිත අනුමැතිය ලබා ගැනීම අනිවාර්ය බව කථානායකවරයා පාර්ලිමේන්තුවට දැනුම් දී තිබෙනවා.
අද (20) පාර්ලිමේන්තුවේදී කතානායකවරයා මේ බව ප්‍රකාශ කළා.
එහිදී අදහස් දක්වමින් කථානායකවරයා සඳහන් කළේ කාරක සභා පැවැත්වෙන අවස්ථාවේදී වෙනත් කිසිදු බාහිර පුද්ගලයෙකුට එම රැස්වීම් කාමර තුළට ඇතුළු විය නොහැකි බවයි.
එමෙන්ම කාරක සභා සභාපතිවරුන් තමන්ගේ විෂය සීමාව ඉක්මවා කාරක සභාවේ වැඩකටයුතු සිදුකිරීම සම්බන්ධයෙන් තමා වෙත විවිධ අවස්ථාවලදී කරුණු වාර්තා වී ඇති අතර පාර්ලිමේන්තුවේ දීර්ඝ කාලයක් පුරා පැවති සාම්ප්‍රදායන් ආරක්ෂා වන අයුරින් කටයුතු කිරීමට සියලුම කාරක සභා සභාපතිවරුන් ස්ථාවර නියෝග අනුව බැඳී සිටින බවද කතානායකවරයා මෙහිදී අවධාරණය කර තිබෙනවා.
තවද කාරක සභාවල වැඩකටයුතු කරගෙන යන අවස්ථාවේ දී විවිධ අමාත්‍යාංශවල, දෙපාර්තමේන්තු, ව්‍යවස්ථාපිත හෝ නොවන ආයතනවල රජයේ නිලධාරීන් කැඳවීමේ දී ඔවුන් අපහසුතාවයට පත් නොවන අයුරින් සහ අදාළ කාරක සභාව විසින් අනුමත කරන ලද කාරණා පමණක් සම්බන්ධයෙන් මාධ්‍ය නිවේදන නිකුත් කිරීමටත් වගබලා ගන්නා ලෙස කථානායකවරයා මෙහිදී දැනුම් දුන්නා.
කථානායකවරයා මෙහිදී අවධාරණය කළේ, අදාළ නිල ලිපි කිසිදු අවස්ථාවක දේශපාලන හෝ පෞද්ගලික කාර්යයන් සඳහා භාවිත නොකළ යුතු බවයි.
කෝප් කමිටුව හෙවත් පොදු ව්‍යාපාර පිළිබඳ කාරක සභාවේ සභාපති තනතුර දරණ ශ්‍රී ලංකා පොදු ජන පෙරමුණේ පාර්ලිමේන්තු මන්ත්‍රී රංජිත් බණ්ඩාර මහතා කෝප් කමිටු රැස්වීමට ඔහුගේ පුත්‍රයාද සහභාගි කරගෙන ඇති බවට පසුගිය දිනක විපක්ෂ නායක සජිත් ප්‍රේමදාස මහතා චෝදනා කළා.
කෙසේවෙතත්, කෝප් කමිටු සභාපතිවරයා එලෙස පුත්‍රයාව කමිටුවට රැගෙන ගොස් තිබුණේ ස්ථාවර නියෝගයකට අනුව බව අමාත්‍ය ප්‍රසන්න රණතුංග මහතා පවසා තිබුණා.
