ජාතික ගීය විකෘති කර ගායනා කළ බව පැවසෙන ගායන ශිල්පිනී උමාරා සිංහවංශගෙන් ප්‍රකාශයක් ලබාගැනීම සඳහා ඇය අද (020 රාජ්‍ය පරිපාලන හා ස්වදේශ කටයුතු අමාත්‍යාංශය වෙත කැඳවා තිබෙනවා.
ඒ සම්බන්ධයෙන් ක්‍රිකට් පාලක මණ්ඩලයෙන් ද ප්‍රකාශයක් ගැනීමට නියමිතයි.
පසුගියදා ජාතික ගීය විකෘති කර ගායනා කළ බවට උමාරාට චෝදනා එල්ල වීමත් සමඟ අග්‍රාමත්‍ය දිනේෂ් ගුණවර්ධන මහතා විසින් ඒ සම්බන්ධයෙන් විමර්ශනයක් සිදුකර වාර්තාවක් ලබාදෙන ලෙස අමාත්‍යාංශ ලේකම් රංජිත් අසෝක මහතාට දැනුම් තිබුණා.
මේ අනුව ලේකම්වරයා විසින් විමර්ශනයක් සිදුකරන ලෙස අමාත්‍යාංශයේ විමර්ශන ඒකකයට පසුගිය 31 වනදා දැනුම් තිබු අතර උමාරා සිංහවංශ මහත්මියට අද (02) පැමිණෙන ලෙසයි දැනුම් දී තිබුණේ.
මෙම විමර්ශනය සඳහා අමාත්‍යංශයේ අතිරේක ලේකම්වරයකු සහ අධ්‍යාපන අමාත්‍යාංශයේ සහකාර ලේකම්වරයකු විසින් සිදු කිරීමට නියමිතයි.
එහිදී ආණ්ඩුක්‍රම ව්‍යවස්ථාව උල්ලංඝනය වීමක් සිදුකර ඇත්ද යන්න සම්බන්ධයෙන් මෙහිදී සොයා බැලීමට නියමිත බව සඳහන්.
තවද තනුව, ගායනය, පදමාලාව වැනි කරුණු ගැන නිසි අවබෝධයක් ලබා ගැනීම සඳහා අධ්‍යාපන අමාත්‍යාංශ නිලධාරියෙකුගෙනුත් සහය ලබා ගැනීමට තීරණය කර තිබෙනවා.
විමර්ශනයෙන් අනතුරුව අදාළ වාර්තාව අමාත්‍යාංශ ලේකම්වරයාට භාරදීමට නියමිත අතර ඉන්පසු නීතිපති උපදෙස් ලබා ගැනීමට නියමිත බවයි වැඩිදුරටත් වාර්තා වන්නේ.
