ශ්‍රී ලංකාවේ වායු සමන යන්ත්‍රවල බලශක්ති කාර්යක්ෂමතා පරීක්ෂාව සඳහා විද්‍යාගාරයක් ස්ථාපනය කිරීම සඳහා කැබිනට් අනුමැතිය හිමි වුණා.
හරිතාගාර වායු (GHG) විමෝචනය අඩු කිරීමේ ව්‍යාපෘතිය යටතේ වායුසමන යන්ත්‍රවල බලශක්ති කාර්යක්ෂමතා පරීක්ෂාව සඳහා ශ්‍රී ලංකාවේ විද්‍යාගාරයක් ස්ථාපිත කිරීම පිණිස සහාය ලබා දීමට දකුණ කොරියානු රජය විසින් එකඟතාව පළ කර තිබෙනවා.
රජය පවසන්නේ කොරියා බලශක්ති කාර්යාංශය හරහා මූල්‍යයනය කරනු ලබන මෙම ව්‍යාපෘතියේ විද්‍යාගාරය ස්ථාපනය කිරීම සහ අවශ්‍ය මානව සම්පත් පුහුණු කිරීමේ කටයුතු 2024 වර්ෂයේදී අවසන් කිරීමට සැලසුම් කර ඇති බවයි.
යෝජිත ව්‍යාපෘතිය ක්‍රියාත්මක කිරීම සඳහා එකඟතාව පළ කරමින් දකුණු කොරියානු රජය සහ ශ්‍රී ලංකා රජය විසින් අත්සන් තැබීමට නියමිත සාකච්ඡා සටහන සහ යොමු කිරීමේ අනුදේශ සඳහා විදේශ සම්පත් දෙපාර්තමේන්තුවේ, විදේශ කටයුතු අමාත්‍යාංශයේ සහ නීතිපති දෙපාර්තමේන්තුවේ එකඟතාව ලැබී තිබෙනවා.
ඒ අනුව, යෝජිත ව්‍යාපෘතිය ක්‍රියාත්මක කිරීමට හැකි වන පරිදි දෙරට අතර එකඟතාව පළ කිරීමේ සාකච්ඡා සටහනට සහ යොමු කිරීමේ අනුදේශයන්ට අත්සන් තැබීම පිණිස විදුලිබල හා බලශක්ති අමාත්‍ය කංචන විජේසේකර මහතා ඉදිරිපත් කළ යෝජනාව අමාත්‍ය මණ්ඩලය විසින් අනුමත කරන ලදී.
