මෙරට ජ්‍යේෂ්ඨ මාධ්‍යවේදියෙකු මෙන්ම ප්‍රවීණ කතුවරයෙකු වන ඒ.ඩී. රංජිත් කුමාර මහතා අභාවප්‍රාප්ත වී තිබෙනවා.
මිය යන විට එතුමා 77 වන වියේ පසු වුණා.
1947 අප්‍රේල් 07 වන දින උපත ලැබූ ඒ.ඩී රංජිත් කුමාර මහතා, ප්‍රවීණ ගායන ශිල්පිනී දමයන්ති ජයසුරියගේ සැමියා මෙන්ම නුවන් නයනජිත් කුමාරගේ පියාණන්ද වනවා.
දශක පහක පමණ කාලයක් පුරාවට දේශපාලන සහ ජනමාධ්‍ය ඇතුළු ක්ෂේත්‍රවල කටයුතු කළ ඒ.ඩී. රංජිත් කුමාර මහතා සරසවිය හා සරසි යන සතිපතා පුවත්පත්වල කර්තෘධුරය හොබවා තිබෙනවා.
කොස්ගස්හන්දිය, ගාමිණී හෙළ සිනමා සක්විති, රුක්මණී දේවි යුගයක ස්වර්ණ ගීතය, සිංහල සිනමාවේ රිදී රේඛාව, නොව පැරණිය ලිපිසරණිය ඇතුළු පොත් ගණනාවක කතුවරයා වන්නේද ඒ මහතායි.
රාජ්‍ය සාහිත්‍ය සම්මාන උළෙලේ උපදේශක මණ්ඩලයේ සාමාජිකයකු වූ ඔහු සරසවිය චිත‍්‍රපට උළෙලේ සහ සුමති ටෙලි සම්මාන උළෙලේ ප්රධාන සංවිධායකවරයා ලෙස ද කටයුතු කර තිබෙනවා.
සුමති සමාගම් සමූහයේ ක‍්‍රියාකාරී අධ්‍යක්ෂ ධුරයද හොබවා ඇති ඒ.ඩී රංජිත් කුමාර මහතා දිනූ සම්මාන අතරට රණපාල බෝධිනාගොඩ සිනමා සාහිත්‍ය අනුස්මරණ සම්මානය, සිරිල් සී. පෙරේරා අනුස්මරණ සම්මානය, ඕසීඅයිසී සම්මානය සහ සුමතිපාල අනුස්මරණ සම්මානය ඇතුළත් වනවා.
