දුම්රිය එන්ජින් රියදුරන් විසින් ක්‍රියාත්මක කර ඇති වැඩ වර්ජනය හේතුවෙන් අද (09) දිනයේ දුම්රිය ගමන්වාර 60කට ආසන්න සංඛ්‍යාවක් අවලංගු කිරීමට සිදුව තිබෙනවා.
දුම්රිය රියදුරු බඳවා ගැනීමේ පටිපාටියේ පවතින ගැටලු ඇතුළු ඉල්ලීම් කිහිපයක් මුල්කර ගනිමින් ලොකෝමෝටිව් ඔපරේටින් ඉංජිනේරු සංගමය පසුගිය 6 වනදා මධ්‍යම රාත්‍රීයේ සිට ධාවනාගාර දෙකක් ආශ්‍රිතව ආරම්භ කළ මෙම වැඩවර්ජනය තවදුරටත් අඛණ්ඩව ක්‍රියාත්මක වනවා.
එම සංගමය පෙන්වාදෙන්නේ, මේ හේතුවෙන් සතියේ ආරම්භක කාර්යාල දිනය වන හෙට දිනයේ දුම්රිය ධාවනයට වැඩි වශයෙන් බාධා එල්ල විය හැකි බවයි.
කෙසේවෙතත් වර්ජනයේ නිරත පිරිස් වල ඉල්ලීම් සම්බන්ධයෙන් විසඳුම් ලබාදීමට අවශ්‍ය පියවර ගෙන තිබියදීත් මෙලෙස වර්ජනය අඛණ්ඩව සිදුකිරිමට සාධාරණ නොවන බව දුම්රිය දෙපාර්තමේන්තුව පවසනවා.
