ආණ්ඩුවේ හවුල්කාර පක්ෂ නායකයන් රැසක්ම විරුද්ධ වීම හේතුවෙන් බැසිල් රාජපක්ෂ මහතා පාර්ලිමේන්තු මන්ත්‍රීවරයකු හැටියට දිවුරුම්දීම ගැන අර්බුදකාරී තත්ත්වයක් මතු වී ඇත.
ජාතික නිදහස් පෙරමුණේ නායක ඇමැති විමල් වීරවංශ මහතා ඉලක්ක කරගෙන ශ්‍රී ලංකා පොදුජනපෙරමුණේ පසුපෙළ මන්ත්‍රීවරුන් දිගින් දිගටම දේශපාලන ප්‍රහාර එල්ලකිරීමත් සමග හවුල්කාර පක්ෂ නායකයන් මේ ගැන සාකච්ඡාවට ගෙන තිබේ.
ආණ්ඩුවේ හවුල්කාර පක්ෂ නායකයකු නිව්ස් 19ට මේ ගැන අදහස් දක්වමින් පැවසුවේ ද්විත්ව පුරවැසියන්ට පාර්ලිමේන්තු වරම් ලැබෙන පරිදි විසි වැනි සංශෝධනය සැකැසීමට තමා විරුද්ධ බවත් ඒ අනුව බැසිල් රාජපක්ෂ මහතා පාර්ලිමේන්තු පැමිණිය ද ඊට එරෙහි වන බවත්ය.
මේ ගැන හවුල්කාර පක්ෂ නායකයන් අතර සාකච්ඡාවක් වූ බවත් බැසිල් රාජපක්ෂ මහතා පාර්ලිමේන්තු මන්ත්‍රීවරයකු හැටියට දිවුරුම් දීමට උත්සාහ කළහොත් දේශපාලන පක්ෂ එකතුව සිය සංයුක්ත මතය ප්‍රකාශ කරන බවත් එම නායකයා කීය.
