ආර්ථික අර්බුදය විසඳීම සඳහා අවශ්‍ය ඩොලර් ප්‍රමාණය සොයා දීමට දෙමළ ඩයස්පෝරාව සූදානම් බව ගෝලීය දෙමළ සංසදය පවසනවා.
පසුගිය රජය විසින් මෙරට ක්‍රියාකාරීත්වය තහනම් කරන ලද ගෝලීය දෙමළ සංසදය ඇතුළු සංවිධාන හයක සහ ඊට සම්බන්ධ පුද්ගලයන් 316කගේ තහනම පසුගිය දා ඉවත් කෙරුණා.
කෙසේ නමුත් ඩයස්පෝරාවට මෙරටට ඩොලර් ලබාදීමට හැකිවන පරිදි යහපාලන ආණ්ඩුව සමයේ සකස් කළ ව්‍යවස්ථා කෙටුම්පත පාර්ලිමේන්තුවේ සම්මත කළ යුතු බවයි ගෝලීය දෙමළ සංසදයේ ප්‍රකාශක සුරේන් සුරන්දිරන් පවසන්නේ.
ලබන මාසයේ ආරම්භවන ජිනීවා මානව හිමිකම් සමුළුව ඉලක්ක කරගනිමින් මෙම තහනම ඉවත් කළ බවට විශ්වාස කරන බවයි බි්‍රතාන්‍යයේ සිට අදහස් දක්වමින් ගෝලීය දෙමළ සංසදයේ ප්‍රකාශක සුරේන් සුරන්දිරන් වැඩිදුරටත් කියා සිටියේ.
මේ අතර, ජාත්‍යන්තර මූල්‍ය අරමුදලේ නියෝජිතයින් සමඟ අද පෙරවරුවේ තාක්ෂණික මට්ටමේ සාකච්ඡා ආරම්භ කරන බව මහ බැංකු අධිපති ආචාර්ය නන්දලාල් වීරසිංහ පවසනවා.
අදින් ඇරඹෙන තාක්ෂණික මට්ටමේ සාකච්ජා සදහා ශ්‍රී ලංකාව නියෝජනය කරමින් මහ බැංකු අධිපතිවරයා ඇතුළු එහි නිලධාරීන් සහ මුදල් අමාත්‍යාංශයේ නිලධාරීන් කණ්ඩායමක් සහභාගිවන බවයි මහ බැංකු අධිපතිවරයා සදහන් කරන්නේ.
බ්ලූම්බර්ග් වෙබ් අඩවිය සමඟින් සම්මුඛ සාකච්ඡාවකට එක්වෙමින් ආචාර්ය නන්දලාල් වීරසිංහ ප්‍රකාශ කර තිබුණේ ජාත්‍යන්තර මූල්‍ය අරමුදලෙන් අපේක්ෂිත ණය පහසුකම මේ වසර අවසන් වීමට ප්‍රථම ලබාගත හැකිවනු ඇති බවයි.
