මත්පැන් නිෂ්පාදනය කරනු ලබන ඩබ්ලිව්.එම්.මෙන්ඩිස් සහ සමාගමට ඔවුන්ගේ ස්කාගාරවල මත්පැන් නිෂ්පාදනය කිරීමේ මෙහෙයුම් නැවත ආරම්භ කිරීමට සුරාබදු දෙපාර්තමේන්තුව අවසර ලබා දී තිබෙනවා.
සුරාබදු කොමසාරිස් කපිල කුමාරසිංහ මහතා මාධ්‍ය වෙත අදහස් දක්වමින් කියා සිටියේ සමාගම ක්‍රියාත්මක කිරීමට කරන ලද ඉල්ලීම් කිහිපයකට අනුව අදාළ අවසරය ලබා දී ඇති බවයි.
2018 ජනවාරි සිට බදු නොගෙවීම හේතුවෙන් ඩබ්ලිව්.එම්.මෙන්ඩිස් සහ සමාගමට අයත් මත්පැන් ස්කාගාරයේ බලපත්‍රය සුරාබදු දෙපාර්තමේන්තුව විසින් අත්හිටුවා තිබුණා.
හිඟ බදු මුදල්, වාරික ගෙවීම් මඟින් ගෙවා දැමීමට සමාගම එකඟ වී ඇති බවත්, ගෙවීම් සිදුකිරීම සම්බන්ධයෙන් රජය අවධානය යොමු කරන බවත් කුමාරසිංහ මහතා පවසනවා.
ඩබ්ලිව්.එම්. මෙන්ඩිස් සමාගම අර්ජුන් ඇලෝසියස් මහතාට අයත් සමාගමක් වනවා.
ඔහුට අයත් පර්පචුවල් කැපිටල් ලිමිටඩ් විසින් 2011 දී ජනප්‍රිය මත්පැන් නිෂ්පාදන සමාගමක් වන ඩබ්ලිව්.එම්. මෙන්ඩිස් සමාගම රුපියල් බිලියනයක මුදලකට මිලදී ගනු ලැබූවා.
එය එවකට අර්ජුන් ඇලෝසියස් මහතා විසින් සිදු කරන ලද වඩාත්ම වැදගත් අත්පත් කර ගැනීම ලෙසයි සදහන් වුණේ.
“2015 බැඳුම්කර වංචාවේ” ප්‍රධාන සැකකාර පුද්ගලයා ලෙසද අර්ජුන් ඇලෝසියස් මහතා නම් කර සිටින අතර ඔහු වසරකට ආසන්න කාලයක් රක්ෂිත බන්ධනාගාර ගත කර සිටියා.
ඔහු හිටපු මහ බැංකු අධිපති අර්ජුන් මහේන්ද්‍රන්ගේ බෑණාද වනවා.
