ඇමරිකා එක්සත් ජනපදයේ නියෝජිත මන්ත්‍රී මණ්ඩලයේ කතානායක නැන්සි පෙලෝසි බරපතල ප්‍රතිවිපාක පිළිබඳ චීනයේ දැඩි තර්ජන නොතකා අද (02) රාත්‍රියේ තායිවානයට පැමිණියා.
මේ සම්බන්ධයෙන් චීනය දැඩි ලෙස කුපිත වී ඇති අතර අමෙරිකානු කතානායකවරියගේ තායිවාන සංචාරයට ප්‍රතිචාර ලෙස චීන හමුදාව හෙට සිට දින 3ක් හමුදා අභ්‍යාස පවත්වන බවට නිවේදනය කර තිබෙනවා.
මීට අමතරව සිවිල් නැව් සහ ගුවන් යානාවලට, අභ්‍යාස කලාපවලට ඇතුළුවීම තහනම් කරමින්ද නිවේදනයක් නිකුත් කර තිබීම විශේෂත්වයක්.
මෙය නැවතත් ලෝක යුද්ධයකට අතවැනීමක් බවට දේශපාලන විචාරකයින් පවසනවා.
චීනය විසින් බලහත්කාරයෙන් අයිතිය කියාපාන තායිවානයට වෙත වසර 25 කින් පසුව ගිය ඉහළම ඇමරිකානු නිලධාරියා වන්නේ කතානායක නැන්සි පෙලෝසියි.
පෙලෝසිගේ මෙම සංචාරය හරහා තායිවානය ස්වයං පාලිත රාජ්‍යයක් බවට ජාත්‍යන්තරය තුළ වටිනාකමක් එක්වීම චීනයේ දැඩි විරෝධයට හේතුවී තිබෙනවා.
තායිවානයේ ස්වෛරීභාවය ලෝක ප්‍රජාව පිළිගන්නා තත්ත්වයක් තුළ චීනය තම යුද ශක්තිය පෙන්වා තායිවානය යටත්කර ගැනීමට සූදානම් වන තත්ත්වයක් මේ වන විට ඇතිවී ඇතැයි දේශපාලන විචාරකයන් පෙන්වා දෙනවා.
මේ අතර ඇමරිකානු කතානායකවරිය තායිවානයට පැමිණීමෙන් පසු ප්‍රකාශයක් නිකුත් කරමින් කියා සිටියේ තමා ඇතුලු එක්සත් ජනපද නියෝජිත පිරිසගේ මෙම සංචාරය “තායිවානයේ විචිත්‍රවත් ප්‍රජාතන්ත්‍රවාදයට සහය දැක්වීම සඳහා ඇමරිකාවේ නොසැලෙන කැපවීම පෙන්නුම් කරන්නක්” බවයි.
“තායිවානයේ සිදු කෙරෙන අපගේ සංචාරය පැහදිලිවම එරට කෙරෙන නියෝජිත කණ්ඩායම් සංව්හාර කීපයෙන් එකක් වන අතර එය කිසිඳු ආකාරයකින් දිගුකාලීන එක්සත් ජනපද ප්‍රතිපත්තියට පටහැනි නොවේ,” ඇය පවසා සිටියා.
