සිරස මාධ්‍ය ජාලය තහනම් කිරීමට රජය උත්සාහ ගනිමින් සිටින බව විපක්ෂ නායක, පාර්ලිමේන්තු මන්ත්‍රී සජිත් ප්‍රේමදාස හෙළි කිරීමෙන් පසු ඊයේ (07) පාර්ලිමේන්තුවේ දැඩි උණුසුම්කාරී වතාවරණයක් ඇති විය.
රජයේ ඉහළ පෙළේ පුද්ගලයින් සිරසට එරෙහිව නීතිඥයින් කණ්ඩායම් සමඟ කුමන්ත්‍රණය කරමින් සිටින බවත් සිරස මාධ්‍ය ජාලය නිහඬ කිරීමට කුමන්ත්‍රණයක් දියත් කර ඇති බවත් මෙහිදී විපක්ෂ නායකවරයා පෙන්වා දෙනු ලැබුවා.
මෙම ප්‍රකාශයෙන් පසුව පක්ෂ, විපක්ෂ මන්ත්‍රීවරුන් අතර ඇතිවූයේ උණුසුම් තත්ත්වයක්.
කෙසේ වෙතත්, ජනාධිපතිවරයා ප්‍රමුඛ රජය විසින් මාධ්‍ය මර්ධනයට කිසිදු වැඩපිළිවෙලක් ක්‍රියාත්මක කර නැතැයි වෙළෙඳ අමාත්‍ය බන්දුල ගුණවර්ධන මහතා මීට පිළිතුරු දෙමින් ප්‍රකාශ කර සිටියා.
අපක්ෂපාතී මාධ්‍ය වාර්තාකරණය කළ රිචඩ්ද සොයිසා වැනි මාධ්‍යවේදින්ට අද වන තුරුත් සිදු වූ දෙයක් නොමැති බව පෙන්වාදුන් වෙළෙඳ අමාත්‍යවරයා, වත්මන් රජය කිසිදු මාධ්‍ය ආයතනයක් මර්ධනය සඳහා කටයුතු නොකරන බවයි පැවසුවේ.
රජය, මාධ්‍ය නිදහසට ගරු කරන බවත් ප්‍රබුද්ධ මාධ්‍ය කලාවක් උදෙසා රජය සෑම අවස්ථාවකම ඉඩ ප්‍රස්ථා ලබා දෙන බවත් සඳහන් කළ අමාත්‍යවරයා, කඩා වැටුණු ආර්ථිකයක් නඟා සිටුවීම වෙනුවෙන් කටයුතු කරන ජනාධිපතිවරයාට එරෙහිව දිනපතාම කරන මෙවැනි ප්‍රකාශ, හෙළා දකින බවත් ප්‍රකාශ කර සිටියා.
