අගුණුකොලපැලැස්ස බන්ධනාගරයේ සිරගත කර සිටින පාර්ලිමේන්තු මන්ත්‍රී රංජන් රාමනායක මහතා ඉතා කුඩා සිර කුටියක රඳවා තැබීමට මේ වනවිට පියවර ගෙන ඇතැයි ‘නිව්ස් 19’ ට වාර්තා වේ.
ඔහු රඳවා ඇති කුටිය අඩි 6ක දිගින් හා පළලින් යුතු එකකි.
විපක්ෂ නායක සජිත් ප්‍රේමදාස මහතා හා හම්බන්තොට දිස්ත්‍රික් පාර්ලිමේන්තු මන්ත්‍රී දිලිප් වෙදආරච්චි මහතා පසුගිය 22 වැනිදා ඔහුගේ සුව දුක් බැලීමෙන් පසු මෙම පියවර ගෙන ඇතැයි බන්ධනාගාර අභ්‍යන්තර ආරංචි මාර්ග සඳහන් කරයි.
මේ අතර රංජන් රාමනායක මන්ත්‍රීවරයාට ආණ්ඩු පක්ෂයට සහාය දක්වන හැටියට විෂය භාර ඇමැතිවරයාගේ පාර්ශ්වයෙන් ඉල්ලීම් ලැබී ඇති නමුත් ඔහු එම ඉල්ලීම් ප්‍රතික්ෂේප කර ඇත්තේ දඬුවම අවසන් වනතුරු බන්ධනාගාරය තුළම කෙසේ හෝ ජීවත් වන බව කියමිනි.
