කොවිඩ්-19 එන්නත් ලබා ගැනීම ප්‍රතික්ෂේප කළ එකම පවුලේ මව, පියා සහ පුතා වෛරසය වැළඳීමෙන් පසු සතියක් ඇතුළත මරණයට වූ පුවතක් පෘතුගාලයෙන් වාර්තා වී තිබෙනවා.
40 හැවිරිදි පුතා ෂෝල්,පියා බැසිල් (73) සහ මව චාර්මාන් (65) ජූලි 10 වැනි දින සති අන්තයේ පවුලේ රාත්‍රී ආහාර වේලක් සඳහා එකට සම්බන්ධ වීමෙන් පසු හදිසියේ රෝගාතුර වී තිබෙනවා.
ඊට පෙර මෙම පවුලේ පියා වකුගඩු රෝගාබාධයක් හේතුවෙන් රෝහල් ගත කර සිටි බවයි පැවස්න්නේ.
රෝග ලක්ෂණ ආරම්භ වී සති දෙකක් ඇතුළත ඔවුන් සියලු දෙනාම මිය ගොස් ඇති අතර පවුලේ ඉතිරි වුණු එකම සාමාජිකයා වන ෆ්‍රැන්සිස් ගොන්සාල්වේස් පවසන්නේ දින කිහිපයකට පෙර ඔහුගේ පියා රෝහල් ගත කිරීමෙන් පසු ඔහුට වෛරසය වැළඳී ඇති බවයි.
දකුණු අප්‍රිකාවේ සිට මෑතක පෘතුගාලයට සංක්‍රමණය වූ ඔහුගේ පවුල එන්නත් විරෝධී සාවද්‍ය තොරතුරුවලට බිය වූ බැවින් එන්නත ලබා නොගත් බව ෆ්‍රැන්සිස් පවසනවා.
තිදෙනාම ලිස්බන් හි සුසාන භූමියක මිහිදන් කෙරුණු අතර කොවිඩ්-19 දරුණුම අවස්ථාවල පවා එකම පවුලේ තිදෙනෙක් මිය ගිය අවස්ථා එරට විරල බව ෆ්‍රැන්සිස් පවසන්නේ දැඩි ශෝකයෙන්.
එන්නත් පිළිබඳ මිථ්‍යා මත හේතුවෙන් සිය පවුලට මෙම දරුණු ඉරණමට මුහුණ දීමට සිදු වූ බව පවසන ෆ්‍රැන්සිස් එන්නත් ලබා ගන්නැයි සියලු දෙනාගෙන් ආයාචනා කර සිටින බව The Sun පුවත්පත වාර්තා කර තිබෙනවා.
