හොංකොං හි විශාලතම සහ ප්‍රජාතන්ත්‍රවාදී ලැදි පුවත්පත ලෙස සැලකෙන ඇපල් ඩේලි පුවත්පත ජුනි 26 වෙනි සෙනසුරාදා මුද්‍රණයෙන් පසු සම්පූර්ණයෙන් වසා දමන බව පුවත්පත ප්‍රකාශයට පත් කරන නෙක්ස්ට් ඩිජිටල් ලිමිටඩ් හි අධ්‍යක්ෂ මණ්ඩලය කණගාටුවෙන් යුතුව දැනුම් දී තිබෙනවා.
පසුගිය කාල සීමාව තුළ මාධ්‍යවේදීන් අත්අඩංගුවට ගැනීම් සහ පුවත්පතේ වත්කම් අත්හිටුවීම හේතුවෙන් පුවත්පත පවත්වාගෙන ගියේ අසීරුතා රැසක් මධ්‍යයේ බවයි පැවසෙන්නේ.
පුවත්පතේ ඩිජිටල් සංස්කරණය ද ඒ අනුව තවදුරටත් පළ නොකරන බව ද සමාගම පවසනවා.
චීනය පිළිබඳ සත්‍ය ආවරණය කිරීම හේතුවෙන් දිගින් දිගටම බලධාරීන් පුවත්පතේ සංස්කාරකවරුන්ට සහ සමාගම් හිමිකරුවන්ට තර්ජනය කරමින් පුවත්පත පළ කිරීමට එරෙහිව බාධා සිදුකර තිබෙනවා.
පසුගිය වසරේ පැනවූ මතභේදාත්මක ජාතික ආරක්ෂක නීතිය යටතේ පුවත්පත වටලා එහි වත්කම් අත්හිටුවීමට බලධාරීන් කටයුතු කර තිබුණා.
විදේශ රටක් හෝ විදේශීය හමුදාවක් සමඟ කුමන්ත්‍රණය කළ බවට සැක කරමින් බදාදා හොංකොං පොලිසිය පුවත්පතේ තීරුලිපි රචකයකු අත්අඩංගුවට ගෙන ඇති බවද ප්‍රාදේශීය මාධ්‍ය වාර්තා කර තිබුණා.
