30 C
Colombo
Sunday, April 14, 2024

ආවා! ආවා! ඇපල් හෝම් පොඩ් මිනි!

- Advertisement -

බොහෝ අය කාලයක් තිස්සේ බලා සිටි උපකරණයක් වන ඇපල් හෝම්පොඩ් මිනි උපකරණය නොවැම්බර් 11 වැනි අඟහරුවාදා එළියට ආවා. එහි හැඩය ඉතා හුරුබුහුටියි.

පුංචි දොඩම් ගෙඩියක් ප්‍රමාණයේ ඩොලර් අනූනවයක් හෙවත් රුපියල් විසිදාහක් පමණ වටිනා ඇපල් ස්පීකරයක්. 2020 අවුරුද්දේ තිබෙන කලබල මදිවාට, අපට අඩුවකට තිබුණේ එච්චරයි කියා කෙනෙක් කියාවි. කෙසේ වෙතත් කිලෝවක් පමණ බර, මඳක් උස මහත ඇපල් හෝම් පොඩ් උපකරණය 2018 දී එළිදැකීමෙන් පසු, එහි වඩා කුඩා වර්ෂන් එකක් දකින්නට බොහෝ ‘තාක්ෂණ පිස්සන්’ (එය මිලදී ගන්න මුදල් තිබුණත් නැතත්) ආසාවෙන් සිටියා.

බොහෝ අය හෝම් පොඩ් මිනි උපකරණය අගයනවා. අංක එකේ ප්‍රශ්නය හඬ ප්‍රමිතිය. බොහෝ අය හිතනවාටත් වඩා ප්‍රමිතිය හොඳ බව උපකරණය මිලදී ගෙන අල්ලා හොල්ලා දිව ගා ‘රස බැලූ’ තාක්ෂණ විචාරකයන් කියනවා. ඒ කියන්නේ ඉතා පුංචි ඉඩකඩක් තුළ අමුණන ලද ස්පීකරයකින් ගන්නට පුළුවන් උපරිම ප්‍රමිතිය.

ස්මාට් ස්පීකරයකින් කරන්න පුළුවන් හැමදේම මෙයින් කළ හැකියි. (ප්‍රමාණයෙන් විශාල ඇපල් හෝම් පොඩ් එක වාගේ දොර අඩයක් ලෙස පාවිච්චි කරන්න නම් බැහැ. එහෙත් අවාසියක් නැහැ. හෝම් පොඩ් මිනි එක හොර පූසන් එළවන්නට ගල් ගෙඩියක් ලෙස පාවිච්චි කරන්න පුළුවන් නිසා.)

හඬ ගමන් කිරීම පහසු වන ඇපල් හෝම් පොඩ්හි ඇති වර්ගයේම රෙදි ආවරණයකින් යුක්තයි. එයට ඉහළින් හෝම් පොඩ්හි තිබුණා වාගේ ස්මාර්ට් තිරයක් තිබෙනවා. ඇපල් ස්මාට්ෆෝන් එක ළං කළාට පසු ඉබේ මැෂිම ආරම්භ වෙනවා. ඔබේ කටහඬින් ‘හේ සිරි’ කියා ගීත වාදනය කරවාගත හැකියි. හෝම් පොඩ් මිනි උපකරණයේත් වයර්වලින් කිසිවක් සම්බන්ධ කරන්න බෑ. එහි ඇති එකම වයරය විදුලිය ලබාගන්නට ඇති කේබල් එක පමණක්. ඒකත් යන්ත්‍රයට සම්බන්ධ වී තිබෙන එකක්. යන්ත්‍රයෙන් ගලවන්න බැහැ.

2020 අවුරුද්ද වන විට ලෝකයේ ජනප්‍රියම තාක්ෂණ උපකරණ වර්ගයක් වන්නේ ‘ස්මාර්ට් ස්පීකර්’. ගූගල් හෝම්, ඇපල් හෝම් පොඩ්, ඇමසන් ඉකෝ යන උපකරණ ඒ අතර ඉදිරියෙන්ම සිටියත් මේ වෙද්දී ලෝකයේ බොහෝ සමාගම් එම සමාගම් තුනේ උපකරණවලට වඩා අඩු මිලට ස්මාර්ට් ස්පීකර්ස් නිපදවනවා. ඒ අතින් ගත්තාම ලංකාවේ පුංචි මුදලක් අතේ ඇති කෙනෙකුට සාපේක්ෂව පුංචි මිලකට ස්පාර්ට් ස්පීකරයක් මිලදී ගන්න පුළුවන්. (ප්‍රමිතිය මිලට ගන්න බැරි බව ඇත්ත.)

ඇපල් හෝම් පොඩ් උපකරණය එළියට ඇවිත්, මුළු වෙළඳපොල ආක්‍රමණය කරනු ඇතැයි සිතුවාට, ඒ උපකරණය හිතූ තරම් සාර්ථක වුණේ නැති බව තාක්ෂණ විචාරකයන් කියනවා. එයට හේතුව තරගකරුවන් රැසක් සිටීම. අනෙක් හේතුව ඇපල් හෝම් පොඩ් මිලෙන් අධික වීම. ඒ නිසා ඇපල් උපකරණවලටම කැමති මුදල් තිබෙන පුද්ගලයන් පමණක් හෝම් පොඩ් මිලදී ගත්තා.

ඇමසන් ඉකෝ මුල්වරට පැමිණීමෙන් පසු තමයි අනෙකුත් උපකරණ පෙළ එළියට ආවේ. ඇලෙස්කා නම් ඇමසන්හි කෘත්‍රිම බුද්ධිය සමඟ සම්බන්ධ වූ අපූරු උපකරණයක් ලෙස එය ජනප්‍රිය වෙද්දී ගූගල් සහ ඇපල් සමාගම් එයට ප්‍රතිචාර දක්වමින් තමන්ගේ උපකරණ නිපදවූවා.

විශාල ප්‍රමාණයේ ඇමසන් ඉකෝ, ගූගල් හෝම් සහ ඇපල් හෝම් පොඩ් පැමිණීමෙන් පසු,  ඒ හැම සමාගමක්ම වඩා කුඩා ප්‍රමාණයේ අතේ ගෙන යා හැකි උපකරණ නිපදවන්න පටන්ගත්තා. ‘අඳින්න මිනි ගවුම අඳින්න’ වාගේ ‘මිනි’ උපකරණ පෙළක් ආවේ ඒ අනුව. ඇපල් හෝම් පොඩ් මිනි යනු එලෙස නිපදවූ කුඩා උපකරණය.

‘ඇමසන් ඉකෝ ඩොට් 3 ජෙනරේෂන්’ ස්පීකරයක් රුපියල් 12000කට පමණ මිලදී ගත හැකියි. එම වර්ගයේම ‘4 ජෙනරේෂන්’ ස්පීකරයක් රුපියල් 19,000කට පමණ මිලට ගත හැකියි. ගූගල් හෝම් පොඩ් මිනි ස්පීකරයක්ද රුපියල් 20,000කට ආසන්න මිලකට නියම වනු ඇති.  ගූගල් නෙස්ට්  මිනි ස්පීකරයක් රුපියල් 15,000ක මිලට ගත හැකියි.

ඇමසන් ඇලෙක්සා හෝ ගූගල්හි ඇති කෘත්‍රිම බුද්ධියට වඩා ඇපල්හි සිටින ‘සිරි’ වඩා දියුණු බව සාමාන්‍ය පිළිගැනීමක් තිබෙනවා. අනෙක ඔබ සතුව ඇපල් දූරකථන, අයිමැක්, මැක්බුක් ආදී උපකරණ සියල්ල තිබෙන්නේ නම්, ඒවාට ගැලපෙන උපකරණය ඇපල් හෝම් පොඩ් මිනි විය හැකියි.

ඇපල් හෝම්පොඩ් මිනි උපකරණය සාමාන්‍යයෙන් ඇපල් සමාගම සතු නොවන වෙනත් සමාගගම්වල උපකරණ හා සම්බන්ධ කරගන්නන බැහැ. ඒ නිසා විවෝ ස්මාර්ට්ෆෝන් එකක් තියාගෙන, අතේ වැඩිපුර සල්ලි ටිකක් තිබුනු පළියට ‘හෝම් පොඩ් මිනි’ එකක් මිලදී ගන්න එපා.

ඒ අනුව,

ඔබට මහා සද්දෙන් නැතිව, කරදරයක් නැතිව තමන්ගේම කටෙන් විධානයක් දී ගීතයක් වාදනය කරවාගැනීමේ විශාල වුවමනාවක් තිබෙනවානම්, ඒ අවශ්‍යතාව වෙනුවෙන් රුපියල් 20,000ක් පමණ විසි කිරීමේ හැකියාවත් තිබෙනවානම් ඇපල් ෆෝන් තිබෙනවානම් ඇපල් හෝම් පොඩ් මිනි ඔබට සුදුසුයි.

එසේ නැතත්, තාක්ෂණය ගැන අවබෝධය ලැබීමේ වුවමනාව තිබේ නම්, ඔබට ඇපල් හෝම් පොඩ් මිනි තාක්ෂණය ගැන පුදුම විය හැකියි. ඒ වගේම, පුංචි තාක්ෂණ සමාගම් මේ තාක්ෂණය පිටිපස්සෙග් ගොස් තව අවුරුද්දකින් දෙකකින් ඔබේ ඇති මුදලට ගැලපෙන මේ සයිස් එකේ ස්මාර්ට් ස්පීකරයක් නිපදවන බව දැනගෙන ඉවසන්නත් පුළුවන්.

RECENT ARTICLES - SINHALA

ප්ලාස්ටික් ජල ටැංකියක් පෙරලී කුඩා දැරියක් මරුට

අරලගංවිල රුහුණුගම ප්‍රදේශයේදී ප්ලාස්ටික් ජල ටැංකියක් පෙරලී යාමෙන් සිදුවූ අනතුරකින් කුඩා දැරියක් මියගොස් තිබෙනවා. පොලීසිය සඳහන් කළේ, වැසිකිළියක් මත රඳවා තිබූ ජල ටැංකියක සිට...

‘අලුත්වීම’ ජීවිතයට අලුත් බලාපොරොත්තුවක් එක් කරනවා – ජනපති

අලුත්වීම ජීවිතයට අලුත් බලාපොරොත්තුවක් එක් කරන බව ජනාධිපති රනිල් වික්‍රමසිංහ මහතා පවසනවා. ජනාධිපතිවරයා පවසන්නේ, ජාතියක් දේශයක් ලෝකයක් ඉදිරියට යනු ලබන්නේ අලුත්වීමෙන් බවයි. සාම්ප්‍රදායික අවුරුද්දට අලුත්...

‘ඔකපතන’ විදුහලට වැඩ වරදියි

අවුරුදු ගීතයක් විකෘති කර, සමාජ මාධ්‍ය ඔස්සේ සංසරණය කිරීම පිළිබඳව සංස්කෘතික කටයුතු අමාත්‍යාංශය පරීක්ෂණයක් ආරම්භ කර තිබෙනවා. සංස්කෘතික කටයුතු අමාත්‍ය විදුර වික්‍රමනායක මහතාගේ උපදෙස් මත...

POPULAR ARTICLES

2024 අවුරුදු නැකැත් සීට්ටුව මෙන්න

හෙට (13) රාත්‍රියේ උදාවන සිංහල හා දෙමළ අලුත් අවුරුද්ද පිළිගැනීම සඳහා මේ වනවිට ශ්‍රී ලංකිකයින් සූදානම් වෙමින් සිටිනවා. රාජ්‍ය නැකත් කමි­ටුව මඟින් සකස් කරන...

උසස් පෙළ ප්‍රතිඵල ගැන දනුම්දීමක්

පසුගිය උසස් පෙළ විභාගයේ ප්‍රතිඵල ලබන මාසය ඇතුළත නිකුත් කරන බව විභාග දෙපාර්තමේන්තුව පවසනවා. එම දෙපාර්තමේන්තුව සඳහන් කළේ, මේ වනවිට ප්‍රතිඵල  ලේඛන නැවත පරීක්ෂා...

තෙල් සංස්ථාවෙන් දැනුම්දීමක්

සිංහල දෙමළ අලුත් අවුරුදු උත්සව සමය තුළ සිපෙට්කෝ ඉන්ධනහල් මගින් අඛණ්ඩ ඉන්ධන සැපයුමක් සඳහා අවශ්‍ය ක්‍රියාමාර්ග ගෙන ඇති බව ලංකා ඛණිජ තෙල් නීතිගත සංස්ථාව...