මෙරටට ලැබීමට නියමිත ඇස්ට්‍රාසෙනෙකා එන්නත් තොගය ප්‍රමාද වී ඇත්තේ ඔලිම්පික් උළෙල නිසා බව රාජ්‍ය අමාත්‍ය චන්න ජයසුමන මහතා පවසනවා.
ඒ, ඊයේ (25) දිනයේදී මාධ්‍ය වෙත අදහස් දක්වමින්.
ජපාන රජය මගින් මගින් පරිත්‍යාගයක් ලෙස ලබාදීමට එකඟවී තිබූ මෙම ඇස්ට්‍රාසෙනෙකා කොවිඩ් එන්නත් මාත්‍රා ලක්ෂ 14 අද හෝ හෙට මෙරටට ලැබීමට නියමිතව තිබූ බවයි රාජ්‍ය අමාත්‍යවරයා පෙන්වා දෙන්නේ.
කෙසේ වෙතත් ජපානයේ පැවැත්වෙන ඔලිම්පික් උළෙල හේතුවෙන් භාණ්ඩ ප්‍රවාහනය කරන ගුවන්යානාවල යම්කිසි ප්‍රමාදයක් සිදුවී ඇති බවත් එබැවින් එන්නත් තොගය මෙරටට ලැබීම දින කිහිපයකින් ප්‍රමාද විය හැකි බවත් ඔහු පවසනවා.
කෙසේ නමුත්, ජනතාවට ඇස්ට්‍රාසෙනෙකා දෙවන මාත්‍රාව නිසැකවම ලබාදෙන බවත් ඒ සම්බන්ධයෙන් අනියත බියක් ඇති කර නොගන්නා ලෙසත් ඒ මහතා ජනතාවගෙන් ඉල්ලා සිටිනවා.
