තලේබාන් පාලනය යටතේ කාන්තා කණ්ඩායමට ක්‍රීඩා කළ නොහැකි බවට පළවන වාර්තා සත්‍ය නම් ඇෆ්ගනිස්ථානය සමඟ පැවැත්වෙන පිරිමි ටෙස්ට් ක්‍රිකට් තරඟය අවලංගු කිරීම්ට ඕස්ට්‍රේලියානු ක්‍රිකට් ආයතනය තීරණය කර තිබේ.
තලේබාන් සංස්කෘතික කොමිෂන් සභාවේ නියෝජ්‍ය ප්‍රධානී අහමදුල්ලා වසික් පසුගිය දා ඕස්ට්‍රේලියානු ගුවන් විදුලිය වන SBS ප්‍රවෘත්ති සේවය සමඟ සාකච්ඡාවකට එක් වෙමින් කාන්තාවන් සඳහා ක්‍රිකට් ක්‍රීඩා කිරීමට තලේබාන් පාලනයක් තුළ ඉඩක් ලැබීමේ හැකියාව පිළිබඳ සිතීම අපහසුයැයි ප්‍රකාශ කරන ලදී.
බදාදා ජාත්‍යන්තර ක්‍රිකට් කවුන්සිලය වසික්ගේ ප්‍රකාශය පිළිබඳ සිය කණස්සල්ල පළ කරනු ලැබුවේය.
ඕස්ට්‍රේලියානු ක්‍රිකට් ආයතනයද මේ පිළිබඳ ඔවුන්ගේ විරුද්ධත්වය ප්‍රකාශ කරමින් සෑම තරාතිරමකම කාන්තාවන් සඳහා ක්‍රීඩා කිරීමට අවශ්‍ය සහයෝගය දක්වන බව ප්‍රකාශ කරනු ලැබීය.
“ඇෆ්ගනිස්ථානයේ කාන්තා ක්‍රිකට් ක්‍රීඩාවට සහය නොදක්වන බවට මෑත කාලීන මාධ්‍ය වාර්තා සනාථ කරන්නේ නම්, හෝබාර්ට් හි පැවැත්වීමට නියමිත යෝජිත ටෙස්ට් තරගය සඳහා ඇෆ්ගනිස්ථානයට සත්කාරකත්වය ලබා නොදීම හැර විකල්පයක් ඕස්ට්‍රේලියානු ක්‍රිකට් ආයතනයට නැත” යනුවෙන් ඔවුන් වැඩිදුරටත් පවසා තිබේ.
දෙසැම්බර් 8 වෙනිදා ආරම්භ වීමට නියමිත එංගලන්තය සමඟ අළුබඳුන තරඟාවලියට පෙර නොවැම්බර් 26 වෙනිදා සිට ඇෆ්ගනිස්ථානයට එරෙහිව ඕස්ට්‍රේලියාවේ පළමු ටෙස්ට් තරගය පැවැත්වීමට නියමිතව තිබුණි.
ඇෆ්ගනිස්ථාන පිරිමි කණ්ඩායමට මේ වන විටත් තලේබාන් සංවිධානයේ සහයෝගය ලැබී ඇත.
