ඉන්දියාවට අවශ්‍ය නම් චැටෝග්‍රම් සහ සිල්හෙට් හි පිහිටි වරායන් භාවිත කිරීමට හැකි බව බංග්ලාදේශ අගමැතිනි ෂීක් හසීනා පවසා තිබේ.
එමගින් කලාපයේ සම්බන්ධතාවය ඉහළ නංවන බවත්, මිනිසුන් අතර සබඳතා වැඩි දියුණු කරන බවත් ඇය ප්‍රකාශ කළ බව ඩකා ට්‍රිබියුන් පුවත්පත වාර්තා කර ඇත.
ඉන්දියාවේ ඊසානදිග ප්‍රාන්තවලට ආසන්නව පිහිටා ඇති නිසා චැටෝග්‍රම් යනු ඉන්දියාවට උපාය මාර්ගිකව වැදගත් වරායකි.
‘ඉන්දීය පදනමේ’ රාම් මාධව් හමු වූ අවස්ථාවේදී බංග්ලාදේශ අගමැතිනිය මේ අදහස් පල කර තිබේ.
හසීනාගේ නායකත්වය යටතේ බංග්ලාදේශයේ සමාජ ආර්ථික ප්‍රගතිය මාධව් මෙහිදී අගය කර තිබේ.
“බංග්ලාදේශය සහ ඉන්දියාව අසල්වැසි රටවල් ලෙස විශිෂ්ට මිත්‍රත්වයක් ඇති අතර මෙම සම්බන්ධතාවය දිගටම පවතිනු ඇතැයි බලාපොරොත්තු වෙනවා” යනුවෙන් ඔහු සඳහන් කළ බව ඩකා ට්‍රිබියුන් පුවත්පත් වාර්තාවේ වැඩිදුරටත් සඳහන් වේ.
