වැඩ තහනමට ලක්වූ හිටපු සොලිසිටර් ජනරාල් දිල්රුක්ෂි ඩයස් වික්‍රමසිංහ මහත්මිය විශ්‍රාම යාමේ දිනයට පෙර යළිත් සේවයේ පිහිටුවන ලෙස පරිපාලන අභියාචනා විනිශ්චය සභාවෙන් දෙන ලද නියෝගය පිළිබඳව පියවර ගන්නා ලෙස ශ්‍රී ලංකා නීතිඥ සංගමය නීතිපති සංජය රාජරත්න මහතා වෙත ලිපියක් යොමු කරමින් ඉල්ලීමක් කර ඇතැයි වාර්තාවෙයි.
ශ්‍රී ලංකා නීතිඥ සංගමයේ සභාපති ජනාධිපති නීතිඥ සාලිය පීරිස් මහතා මෙම ලිපිය නීතිපතිවරයා වෙත යොමුකර තිබේ.
හිටපු සොලිසිටර් ජෙනරාල් දිල්රුක්ෂි ඩයස් වික්‍රමසිංහ මහත්මිය නිර්දෝෂී බවට පරිපාලන අභියාචනා විනිශ්ච සභාව විසින් නිගමනය කිරීම හේතුවෙන් ව්‍යවස්ථාපිත විනිශ්චය සභාවක් ලෙස එහි තීරණයට ගරු කිරීම ව්‍යවස්ථාමය වගකීමක් බව මෙම ලිපිය තුළින් ශ්‍රී ලංකා නීතිඥ සංගමය පෙන්වා දී ඇත.
ඇවන්ගාඩ් සමාගමේ සභාපති නිශ්ශංක සේනාධිපති සමඟ දුරකතනයෙන් කළ සංවාදයක හඬපටයක් මාධ්‍ය ඔස්සේ හෙළිදරව් වීම පසුගිය සමයේ මහත් අන්දොලනකයට ලක් වූ අතර පසුව එම සිදුවීමට අදාළව එවකට නීතිපති දෙපාර්තමේන්තුවේ සොලිසිටර් ජෙනරාල්වරිය ලෙස කටයුතු කළ දිල්රුක්ෂි ඩයස් වික්‍රමසිංහ මහත්මිය සම්බන්ධයෙන් මූලික පරීක්ෂණයක් ආරම්භ කරන ලෙස 2019 සැප්තැම්බර් මස 23 වන එවක නීතිපතිවරයාව සිටි දප්පුල ද ලිවේරා මහතා රාජ්‍ය සේවා කොමිෂන් සභාවෙන් ඉල්ලීමක් කළා.
හිටපු සොලිසිටර් ජෙනරාල් දිල්රුක්ෂි ඩයස් මහත්මියගේ වැඩ තහනම් කෙරුණේ ඒ අනුවයි.
කෙසේ වෙතත් ඒ සම්බන්ධයෙන් පරිපාලන අභියාචනා විනිශ්ච සභාව සිදුකළ පරීක්ෂණයට අදාළව මොරටුව විශ්ව විද්‍යාලයේ විමර්ශන කණ්ඩායමක් හා රජයේ රස පරීක්ෂකවරයා තහවුරු කර තිබුනේ ප්‍රශ්නගත හඬ පටය අවස්ථා ගණනාවකදී සංස්කරණය කර විකෘති කර ඇති බවයි.
ඒ අනුව එම දුරකථන සංවාදය හේතුවෙන් වැඩ තහනමට ලක් වූ හිටපු සොලිසිටර් ජනරාල් දිල්රුක්ෂි ඩයස් වික්‍රමසිංහ මහත්මිය එලෙස වැඩ තහනමට ලක් කිරීම වරදක් බවත් ඇය වහා සේවයේ පිහිටුවීමට කටයුතු කරන ලෙසත් පරිපාලන අභියාචනා විනිශ්චය සභාව නියෝග කර තිබුණා.
