සෞඛ්‍යට අහිතකර ආහාර ප්‍රවර්ධන දැන්වීම් දිවා කාලයේදී රූපවාහිනිය සහ අන්තර්ජාලය ඔස්සේ ප්‍රචාරය කිරීම තහනම් කිරීමට බ්‍රිතාන්‍යය තීරණය කර තිබෙනවා.
ඒ ස්ථුලතාවය වැලැක්වීමේ සහ සෞඛ්‍යට හිතකර ආහාර පරිභෝජනය දිරිගැන්වීමේ වැඩපිළිවෙළ යටතේයි.
නව නීතිය ලබන වසරේ අගභාගයේ සිට ක්‍රියාත්මක වනු ඇති. දැනට බ්‍රිතාන්‍යයේ ප්‍රාථමික පාසල් දරුවන් තිදෙනෙකුගෙන් එක් අයෙක් අධික බර හෝ ස්ථුලතාවයෙන් පෙළීමේ ප්‍රවණතාව වෙනස් කිරීම සඳහා නව ක්‍රියාමාර්ග හේතුවනු ඇතයි අපේක්ෂා කෙරෙනවා.
කෙසේ වෙතත් එරට ඇතැම් දැවැන්ත මාධ්‍ය ආයතන නව නීතිය සම්බන්ධයෙන් කෝපාවිෂ්ඨ ප්‍රතිචාර දක්වන බව රොයිටර්ස් පුවත් සේවය වාර්තා කළා.
නව සැලසුම අනුව මේදය, සීනි සහ ලුණු අධික ආහාර පිළිබඳ දැන්වීම් රාත්‍රි 9ට පෙර බ්‍රිතාන්‍යය රූපවාහිනී නාලිකාවල ප්‍රදර්ශනය තහනම් වනවා.
එමෙන්ම මුදල් ගෙවා අන්තර්ජාලය ඔස්සේ ප්‍රදර්ශනය ද තහනම් වනු ඇති.
කෙසේ වෙතත් අදාළ නිෂ්පාදන සමාගමේ වෙබ් අඩිවියේ හෝ සමාජ මාධ්‍ය ගිණුමක ප්‍රදර්ශනයට අවසර ලැබෙනවා.
2018 වසරේදී බ්‍රිතාන්‍යය සීනි බද්දක් හඳුන්වා දුන් අතර ඒ අනුව බීම නිෂ්පාදන සමාගම් රැසක් සිය නිෂ්පාදනවල සීනි මට්ටම අඩුකිරීමට පියවර ගත්තා.
බ්‍රිතාන්‍යයේ රූපවාහිනී නාලිකාවල ප්‍රචාරය කරන ආහාර පිළිබඳ වෙළෙඳ දැන්වීම්වලින් අඩක්ම සෞඛ්‍යට අහිතකර ආහාර පිළිබඳ දැන්වීම් බව මෑතක කල අධ්‍යයනයකින් හෙලිවී තිබෙනවා.
