ශ්‍රී ලංකාවේ විවාහ ලියාපදිංචි කිරීමේ ආඥ පනත යටතේ මුස්ලිම්වරුන්ට විවාහ වීමට අවසර දෙන යෝජනාවක් කැබිනට් මණ්ඩලය විසින් අනුමත කර තිබේ.
මේ සම්බන්ධයෙන් අධිකරණ අමාත්‍ය අලි සබ්රි මහතා විසින් ඉදිරිපත් කරන ලද යෝජනාවකට කැබිනට් අනුමැතිය ලැබී ඇත.
ඒ අනුව ඉස්ලාම් ආගම අදහන්නන් විවාහ ලියාපදිංචි කිරීමේ ආඥා පනත යටතේ විවාහවීමට අදහස් කරනු ලබන්නේ නම් යන කොන්දේසි මත සිවිල් නඩු විධාන සංග්‍රහය සංශෝධනය කිරීමට යෝජනා වී තිබේ.
ආණ්ඩුක‍්‍රම ව්‍යවස්ථාවේ 12 වන වගන්තියට අනුව ජාතිය, ආගම, භාෂාව, කුලය, ස්ත්‍රී පුරුෂ භාවය, දේශපාලන මතයන් හෝ උපන් ස්ථානය යන කරුණු පදනම් කරගෙන කිසිදු පුරවැසියෙකුට වෙනස්කම් කිරීම නොකළ යුතුය.
කෙසේ වෙතත්, මුස්ලිම් විවාහ හා දික්කසාද පනතට කාන්තාවන්ට වෙනස් කොට සැලකීමේ විධිවිධාන ඇතුළත් වේ.
මුස්ලිම් ප්‍රජාවට අයත් විවිධ කාන්තා සංවිධාන සහ මුස්ලිම් නීති විශාරදයින් එවැනි විධිවිධාන නීතියෙන් අවලංගු කිරීමේ අවශ්‍යතාව පෙන්වා දී ඇතැයි රජය පෙන්වා දී තිබේ.
එබැවින් ශ්‍රී ලංකාවේ පුරවැසියන්ගේ විවාහය හා දික්කසාදය පාලනය කරන පොදු නීතිය යටතේ මුස්ලිම් ප්‍රජාවේ ජනතාවගේ විවාහය සහ දික්කසාදය පාලනය කිරීම සඳහා විකල්ප අවස්ථා ලබා දීම සුදුසු බව රජය සදහන් කරයි.
