රටේ තෝරාගත් ස්ථානවල කන්ටේනර් බහාලුම් භාවිතයෙන් එළිමහන් ව්‍යායාම හා යෝග්‍යතා මධ්‍යස්ථාන 500 ක් ස්ථාපිත කිරීම සඳහා ක්‍රීඩා අමාත්‍ය නාමල් රාජපක්ෂ මහතා ගෙන ආ යෝජනාවට කැබිනට් අනුමැතිය ලැබී තිබෙනවා.
‘අපි ජය ගනිමු’ යන තේමාව යටතේ කන්ටේනර් බහාලුම් භාවිතයෙන් මෙම එළිමහන් ව්‍යායාම ශාලා 500 දිවයින පුරා ඉදිකිරීමට නියමිතයි.
මෙම ව්‍යාපෘතිය තරුණ පරපුර තුළ ක්‍රියාශීලී ජීවන රටාවක් ඇති කිරීම සහ ක්‍රීඩා ක්ෂේත්‍රයේ ප්‍රගතිය සඳහා යම් උත්ප්‍රේරකයක් සැපයීම අරමුණු කරගත් බවයි සදහන් වන්නේ.
ව්‍යාපෘතියේ ඇස්තමේන්තුගත පිරිවැය රු. මිලියන 625 ක් වන අතර එමඟින් වසරකට මහජනතාව 100,000 කට සහ ක්‍රීඩක ක්‍රීඩිකාවන් 5000 කට පමණ ප්‍රතිලාභ සැලසෙන බව සදහන්.
මෙම මධ්‍යස්ථාන පවත්වාගෙන යාමේ වගකීම ප්‍රාදේශීය මට්ටමින් යෞවන සමාජ හා ක්‍රීඩා සමාජ වෙත පැවරෙනවා.
එමෙන්ම අවම වශයෙන් එක් පුහුණුකරුවෙකු එක් මධ්‍යස්ථානයක් සඳහා බඳවා ගැනීමටද නියමිතයි.
මේ අතර ව්‍යාපාරික දිලිත් ජයවීර මහතාට අයත් ජෝර්ජ් ස්ටුවර්ට් හෙල්ත් පුද්ගලික සමාගම විසින් GS ස්පෝර්ට්ස් නමින් ක්‍රීඩා හා ව්‍යායාම උපකරණ වෙළඳසැලක් පසුගිය 30 වනදා ආරම්භ කළා.
අංක 445, ගාලු පාර, කොළඹ යන ලිපිනයේ ඇති මෙම ව්‍යාපාරික ස්ථානය ක්‍රීඩා අමාත්‍ය නාමල් රාජපක්ෂ මහතා විසින් විවෘත කරනු ලැබූවා.
