මහ බැංකුවේ ප්‍රධාන ගොඩනැගිල්ලේ අධි ආරක්ෂිත කාමරයක ගබඩා කර තිබූ රුපියල් ලක්ෂ 50ක මුදලක් අස්ථානගත වීමේ සිද්ධිය සම්බන්ධයෙන් සැකකරුවන් අත්අඩංගුවට ගෙන අධිකරණයට ඉදිරිපත් කරන ලෙස කොළඹ අතිරේක මහේස්ත්‍රාත් හර්ෂණ කැකුණවෙල මහතා කොටුව පොලීසියට ඊයේ (18) නියෝග කර තිබෙනවා.
ඒ සම්බන්ධයෙන් කොටුව පොලීසිය අධිකරණයට කරුණු වාර්තා කරමින් ඉදිරිපත් කළ බී වාර්තාව සලකා බලමින් මහේස්ත්‍රාත්වරයා මේ බව නියෝග කර ඇති බවයි වාර්තා වන්නේ.
මහ බැංකුවේ අධි ආරක්ෂිත කාමරයක ගබඩාකර තිබූ රුපියල් පන්දහසේ මුදල් නෝට්ටු දාහක බණ්ඩලයක අස්ථාන ගත වී ඇතැයි සඳහන් කරමින් මහ බැංකුවේ ව්‍යවහාර මුදල් දෙපාර්තමේන්තුවේ ජ්‍යෙෂ්ඨ සහකාර අධිකාරි එස්.ආර්. දයානන්ද මහතා ඉකුත් 11 වැනිදා මෙම පැමිණීල්ල ඉදිරිපත් කළ බවට කොටුව පොලීසිය අධිකරණයට කරුණු ඉදිරිපත් කර තිබෙනවා.
කොටුව පොලීසිය මහේස්ත්‍රාත්වරයා වෙත දැනුම් දී ඇත්තේ මේ සම්බන්ධයෙන් විමර්ශන ආරම්භ කර ඇති බැවින් අදාළ දෙපාර්තමේන්තුවේ නිලධාරීන් 06 දෙනකුගෙන් ප්‍රකාශ සටහන් කර ගත් බවයි.
තවද මහ බැංකුවේ අධිආරක්ෂිත කාමරයේ ගබඩා කර තිබූ මෙම මුදල්වල අඩුවීම සම්බන්ධයෙන් එම දෙපාර්තමේන්තුවේ තවත් නිලධාරීන් කිහිප දෙනකුගෙන් මේ වන විටත් ප්‍රකාශ සටහන් කර ගනිමින් සිටින බවත් එම ප්‍රකාශ සටහන් කර ගැනීමෙන් පසුව විමර්ශන ප්‍රගතිය අධිකරණයට වාර්තා කරන බවත් කොටුව පොලිසිය අධිකරණයට සිය බී වාර්තාවෙන් කරුණු ඉදිරිපත් කර තිබෙනවා.
