මහ බැංකු ඉතිහාසයේ දිනක් තුළ වාර්තා කළ වැඩිම මුදල් ප්‍රමාණය මුද්‍රණය කිරීමට මහබැංකුව ඊයේ (28) කටයුතු කර ඇතැයි වාර්තා වේ.
කොවිඩ්-19 වෛරසය ආශ්‍රිත අගුලු දැමීම් සහ වෛරසය පාලනය කිරීම සඳහා වන වියදම් වැඩිවීම සහ බදු ආදායම් හැකිළීම මධ්‍යයේ ඇති වී තිබෙන අයවැය හිඟය පියවා ගැනීම වෙනුවෙන් මෙම මුදල් මුද්‍රණය කිරීමට කටයුතු කර තිබේ.
පසුගිය සතියේ රුපියල් බිලියන 23 ක් මුද්‍රණය කර ඇති මහ බැංකුව ඊයේ (28) මුද්‍රණය කරනු ලැබූ මුදල් ප්‍රමාණයේ වටිනකම රුපියල් බිලියන 208.45 ක් වේ.
නිදහසින් පසු ශ්‍රී ලංකා ආර්ථිකයේ දරුණුතම අර්බුදය මේ වන විට පවතින බව වෙළඳ අමාත්‍ය බන්දුල ගුණවර්ධන මහතා මෑතකදී ප්‍රකාශ කළ අතර රාජ්‍ය අංශයේ සේවක සහ විශ්‍රාම වැටුප් ගෙවීමෙන් පසු වෙනත් වියදම් සඳහා බදු මුදල් ඉතිරි නොවන බව ප්‍රකාශ කරන ලදී.
